Chhurbura roh em em; Nahaia'n neihsak phet a tum!

Posts tagged “Mizoram

Chhinlung Sichuan Province-ah a awm an ti maw ?

Mizote hian ziak a history upa tak chhui tur kan neih loh avangin kan lo chhuahna tak leh kan thlangtlak tan na tak hi kan chiang fak hleithei lo chu ani a. Kan hriat hlat theih ber ‘CHHINLUNG’ atanga lo chhuak kan ni tih hi ani mai awm e.

Hman atang tawhin he Chhinlung hi zawn a, ngaihven a; khawi ram lamah nge a awm tih a chhui ani deuh fo tawh a. Tu’n an la hmuchhuak lem lo ani ngei ang. Nge, tih tak takin kan chhui lo zawk ? Nge , Chhinlung hi a awm lo hrim hrim zawk ?

Tunhnaiah, Rev. Lalremliana chuan, ‘ Chhinlung khua chu China ram a, Sichuan Province-ah a awm a, mi 4000 vel an cheng. Tibet hnam an ni a, sakhuana lamah chuan Bhuddist an ni ‘ a ti a. Tin, kan hnam tihdan leh culture, tawnga thil inang kan neih te a sawi lang nual bawk a. Rev. Lalremliana hian a hmun ngeiah he khua hi a tlawh anih a rinawm a. Rev. ani bawk a, a thuhriatte a rintlak turah ngai ang.

Chhinlung khua chu Sichuan Province-a a awm thu, Rev. Lalremliana’n a sawi hi; The Aizawl Post, May 5. 2012 a chhuak kha, ka thiannun a copy  chu thla la in ka chhiar ve turin min rawn thawn a. Ka rilru a luah ta reng a.

Zawhna awm thei tam tak a awmin ka hria. Rev. Lalremliana hian engtinnge, Mizo history a; Chhinlung an tih kha, Sichuan Province ami hi ani ngei tih a finfiah theih. The Aizawl Post chanchinbu, May 5 . 2012- a chhuaka a sawi  danah hi chuan, kan tawng in an thute, tap a lungthu pathum an hman thute, khawkrawk tih tawngkam an hman ve thute leh di leh dap an hmanve thuute atarlang a. Heng hi  Mizo thlangthla bang an ni e, tih nana  thutlukna siam nan chuan a ho lam deuhvin a hriat. Achhan chu, Yunnan Province- ah ngei pawh hian hetianga kan inanna sawi tur leh chhui dawn tur hnam hi an tam em em. Chung zingah chuan, Hani hnam te, Jingpo hnamte hi kan ang lehzual a. Jingpo hnam nen phei hi chuan kan tawng pawh inang; lam rik dan inang leh sawi thuhmun a awm nual mai !  Han chhui dawn takah chuan, Yunnan Province, China vela tribal ( minorities ) awm te, Vietnam leh Thailand ramri bawr vela awm hi chu kan in anna lai sawi tur a tam khawp mai.

Rev. Lalremliana’n , ” Thlangtla an sawi thin. An thawnthuah pawh kan thlangtlak dante hi an la nei vek a, thurochhiahte pawh an nei. Keini ( Mizo ) te hi a upa zawkah min dah, “ tia a sawi hi chu, ngaihven zui tlak leh chhui chian chakawm tak ani . Mizo historian ho tana, chiang zawk leh chipchhiar zawk a chhui duhtu tan kawng a sat zau hle mai.

” Chhinlung khua kan pi leh pu te’n doral hlauva Yalong lui mawng lama an tlawh thlakna kawngte chu a la thlur thla ruih mai a…” tiin a sawi bawk a. A sawi lunglen thlak thiam khawp mai. Heng kawngte pawh hi kan pi leh pute kawng zawh ngei ani chek ang chu maw !

Chhinlung = Sinlung ? ! A hming hi kan buaina leh kan rilru min hnehtu ber chu ani  awm e. ‘Chhin’ tih lai tak hi rang vutin an lam a, thenkhat chuan Chinlung an ti bawk a. Map lamah erawh chuan Sinlung tia ziak te pawh ani tiin a sawi bawk. Rev. Lalremliana hian, Chhinlung tih thumal hi, Chinese tawng ( Mandarin ) nge anih a, Tibetan tawng anih a sawi lem lova. Mandarin anih chuan, Chhinlung tih a, ‘CHHIN’ tih lai tak hi, Mandarin thumal anih arinawm lem loh ! Tin lo ni ta pawh nise,  Chhinlung tih khaw hming  Sichuan province-ah hian map-ah hmuh tur re re a awm lo.

 Map lamah Sinlung anti a ti a. Map ka hmuh theih chin chin kan en hian , SINLUNG tia khaw hming pu a awm bawk si lova. Sinlung tih hian Mandarin a a awmzia ahnai theih deuh thova. Tihian lo siamrem ta ila : SINLUNG tih chu XIN LONG ani thei mai em?  A awmzia chu, Xin= Thar (new ), Long = Rulpui ( Dragon ) tihna lo i ta se, Tibetan culture leh Chinese ( Han ) culture a, Dragon an ngaih ropui zia nen a khaikhinin a awmang thei deuh. Hei pawh hi a thluk dan azirin a awmzia adang leh daih thova, tin hetia Chinese tawng; Roman Script- ‘ piyin’ a ziah hi a Chinese Script ( Han Zi ) a ziah dan hmuh tel loh chuan awmze hrang daih anei leh thei bawk. Tin, Chinese tawnga thumal awmzia dik tak hre tur chuan Han Zi ( Chinese script ) kan en ngei ngei tur ani ang.

Xin Long tih pawh chu lo ni tase; Tibetan hnam ho awmna anih avangin Xin Long tia an koh chu a rinawm lem loh bawk. Anmahni Tibetan tawngin ( Tibetan hnamah pawh eng hnam ber, Kham, Amdo etc. ) he khaw ‘original’ hming hi an nei em emin a rinawm. China a tribal hnam tamtakte, chenna khaw hming hi Chinese sorkarin a thlak sak, Mandarin a dah sak khaw chhiar sen loh a awm. Hetia, khaw hming pakhat kan tawng nen a rik dan a inzul avang mai a, ani ngei e tih tawp mai hi chu pawm a harsa deuh ani. A naka ka zen kher hma chuan !

A hming chungchang pawh hi, Rev. Lalremliana hian han sawifiah thui thei deuh ta se. Tin, CHHINLUNG / SINLUNG chu Sichuan Province a, eng county, eng prefecture chhungah nge a awm tihte han sawi lang thei se chuan, chutia kan pi leh pute ; China rama la chambang awmte chu hman lo chung chung pawn kan va tlawh chhuak ve hram tur ! Tibetan sakhuain a la phuarbeh tlat an nih phei chuan, keini an tu leh fate hian Lal Isua Chhandamna hrilh chu kan bat avan ni dawn rua em !

A hnuaia mi hi The Aizawl Post a mi chu ani a, chhiar ve duh in awm tak in.

Chhinlung chuak Mizote


Kristian vanram kawng zawh thu Bung-3

Chutichuan ka mumangah chuan chung thu an sawi lai chuan phaizawl chirhdup nasa tak chu an lo hnaih ta em em a. Chutia engmah ngaihtuah lova an awm lai chuan chirhdup hmunah chuan an lo lut dun ta a. Chumi hmun hming chu Lungngaihna Chirhdup hmun a ni. Chutah chuan an han kal a, chirhdiak chu nasa takin an kai ta a; Kristiana chu a hnunga phurrit tak awm avang chuan a lo pil dawn ta a.

Chutichuan Thlemsama chuan,”E hei ! Thian Kristian, khawiahnge i awm tak?” a ti a. Kristiana chuan,”Ka hre hauh lo mai,” a ti a. Chutichuan Thlemsama chu a lungnilo tan ta hle mai a, thinur takin a thian hnenah chuan,”Heng hi maw lawmna tia min hrilh kha?Atir apanga hetiang a nih chuan kan kalna tur tak kan thlen hmain eng ang hrehawm tak te la tawk cheu ang i maw ? Kei zawng ka chhuah leh theih phawt chuan ka kir leh mai ang, duh leh chumi ram chu chang bik mai ang nang che,” a ti a. Chutichuan chhuah tumin a han bei chiam a, chumi chirhdup  hmunah in lam pangah chuan a chhuak leh ta a. Chutichuan a kal bo va, Kristiana chuan a hmu leh ta lo va.

Kristiana chu amah chauhvin Lungngaihna Chirhdupah hmunah chuan a awm a; nimahsela chirhdup ral leh lampang kawngkhar awmna lamah chuan chhuah a tum tal a; nimahsela a hnungzanga phurrit tak awm avang chuan a chhuak thei lo va.

Tin, ka mumangah chuan, chu mi hmuna a la awm lai chuan mi pakhat a hming Puitua a hnenah chuan a lo kal a, chutah chuan engnge a tih a va zawt a. Kristiana chuan,”Ka pu, mi pakhat Pathianthuhriltuan saw laia kawngkhar saw min kawhhmuh a, chutah chuan thinurna lo thleng tur tlansan turin ka kal dawn a ni, chutichuan hetah hian ka lut ta mai a ni,” a ti a. Tin, Puitua chuan,”Engatinge kawng chu tha taka i en loh le ?” a ti a. Kristiana chuan,”Hlauhawm nasa takin min zui a ka hmanhmawhin kawng chu ka en tha hman lo lo va, hetah hian ka lo lut ta mai a ni,” a ti a. Tin, Puitua chuan,”A nih leh i kut min han pe rawh le,” a ti a. Tin, ani chuan a han pe a, a hnuk chhuak a a kalna tur lamah chuan a kaltir leh ta a.

Tin, a hnuk chhuaktu hnenah chuan ka va kal a, a hnenah,” Ka pu,he mi hmun hi Boralna khua atangin sawta kawngkhar kalna saw a ni si a, mi veivakte thlamuang taka an kal theih nan engngatinge siam that a nih loh?” ka va ti a. Tin, ani chuan,”He hmun hi siam that theih rual a ni lo, bawlhhlawh tinreng luankhawmna a ni a; chuvangin a hming pawh Lungngaihna Chirhdup hmun tih a ni. Chu lo rengah pawh, mi sualin an bonate an lo hriat chuan, hlauhna te,  rinhlelhna te, lungngaihna te an lo nei a, chung chu hetah a luang khawm  vek a; chuvang chuan a lei a tha lo a ni. Chumi chu Lalpain  a duhzawng a nih avanga awmtir a ni lo; hnathawktute pawhin siamthat tumin  kum tam tak an bei tawh a, tawlailir tam takte pawh a pil tawh a, a siam that nan Lalpa ram ata thilte an rawn la a, a siam that theih mahna tiin vawi tam tak an bei tawh a; nimahsela tunah pawh a tha chuang lo va, a ngaiin a la awm reng a ni. Dan petute pawhin chumi chirhdupah chuan  rahka an siamtir thin a, nimahsela chu mi chirhdupah chuan bawlhhlawh a lo chhuak a, a hmuh a lo harsa leh mai thin a ni. An hmuh theih pawhin an lu haiin rahka chu an rap thelh a, an bawlhhlawh leh vek thin a ni. Kawngka an luh hnu saw zawngin a lei a lo tha tawh a ni,” a ti a.

Tin, ka mumangah chuan, Thlemsama chu a in a lo thleng leh tawhin ka hmu a. A thianteho chu a inah an leng khawm a. A then chuan a lo kir leh avang chuan fing an ti em em mai a. Thenkhat erawh chuan,”Kal i tum tirh atang reng khan hrehawm tlemte pawh i tuar peih kan ring lo reng a ni ,” an ti a, an nuihsan a. Chutichuan Thlemsam chu a tau reng mai a; nimahsela a tawpah zawng a lo tawng ngam ta deuh va, an thu an lamlet a, Kristiana chu an nuihzatbur ta zawk a. Thlemsama lamah an tang leh ta zawk a.


Kristian Van Ram Kawng Zawh Thu: Bung -2

A kal chu en turin a thenawmte pawh chu an lo chhuak bawk a; chutia a kal lai an hmuh chuan thenkhatin an tihthaih a, thenkhat erawh chuan lo kir leh turin an au chiam a. Tin, chutianga titute zingah chuan mi pahnih chuan amah hruai kir luih an tum a; pakhata hming chu Tihmawha a ni a, pakhat chu Thlemsama a ni. Chutih lai chuan ani chuan thui tak a lo thleng tawh a; nimahsela anni chuan um an tum tlat a. Chutichuan rei lo teah an va umpha ta a. Tin, ani chuan, ” Thiante u, eng tiziaa lo kal ve nge in nih” a lo ti a. Tin, anni chuan,” Kan hnena kir leh tura thlem chein,” an ti a. Ani chuan, ” Chutia tih mai tur chu a ni lo ve, Boralna khuaah in awm a: chu chu ka pianna khua a ni a, chu khua chu a boral dawn tih ka hria a; tun lawkah pawh a ni thei. Engpawh ni se in la thi ngei dawn a, chuta in thih chuan, thlan aia thuk mei leh kata alh awmnaah chuan in la awm ang; chutichuan thiante u, ka hnenah lo kal ve zawk rawh u khai,” a ti a.

Tin, Tihmawha chuan, ” Enga a ni ! Kan thiante, kan lawmnate kan kalsan ang maw ?” a ti a. Tin, Kristiana chuan ( chu chu a hming a ni a ) “Ni e, chung thil zawng zawng in kalsan tur chuan ka lawmna zawn pangkhing te pawh a thluk lo, ka hnenah in kal ve zel chuan keimah ang bawkin in awm ang a, chu mi ka kal tumna hmun chu luah sen rual a ni lo va, lo kal ula ka thu fiah rawh u,” a ti a. Tin, Tihmawha chuan, ” He khawvela thil zawng zawng  kalsana hmuh i tum chu thil engnge maw ni le ?” a ti a. Tin, Kristiana chuan ” Ro chhe thei lo, tihbawlhhlawh theih loh, kumkhuaa thianghlim taka awm tawhna ka zawng a ni. Chu chu vanah a awm a, chutichuan tupawh taima taka zawngtute chuan chu lawmna chu a la hmu ang. In duh chuan ka lehkhabu hi han chhiar rawh u,” a ti a.

Tin, Tihmawha chuan, ” Mai mai a, i lehkhabu chu dah la, kan rualin i kir leh ve ang nge kir lo vang tih sawi mai rawh,” a ti a. Kristiana chuan, ” Leilehnaa ka kut ka nghah tawh avangin ka kir lo vang,” a ti a. Chutichuan Tihmawha chuan,” A nih leh hawh thian Thlemsam i kirsan leh mai ang. Hetiang mi a deuh leh mahni induh mite hi eng pawh an rin tawh chu dikin an ring thin a, mi zawng zawng aia fing berah an inruat thin reng a ni ” a ti a. Thlemsama chuan,” Hau mai teh suh u khai, he mi tha tak, Kristiana thusawi hi a dik chuan, a thil zawn chu keini zawn ai chuan atha zawk e, kei chu ka thian hnena kal ve hi ka chak rilru ta hle mai a,” a ti a. Tihmawha chuan,” Eng a ni ! I a zawk mah dawn e lo maw, ka thu chu awi la, kir leh reng reng rawh, he mi a hian khawiahnge a hruai thlen tehlul ang che ? Fing la, lo kir leh reng reng la a nih chu,” a ti a. Kristiana chuan, ” Mawi a, a ni lo ve, thian Thlemsam, kir leh suh; lawmna ka sawi zawng zawngte kha neih tur a awm a ni. I awih loh chuan hei, ka lehkhabu hi chhiar rawh, hei hi ama thisenin a nemnghet a ni,” a ti a. Tin, Thlemsama chuan, “Thian Tihmawh, ngawi teh, ka hre fiah dawn ta e, he mi, mi tha tak hnenah hian kal ka tum ta ani,” a ti a.

Tin, Kristiana hnenah pawh chuan,”A nih leh ka thian, chu kan kal tumna chu a kawng i hria em ?” a ti a. Kristiana chuan, ” Mi pakhat a hming Pathianthuhriltua chuan a kawng min kawhhmuh a, chu mi kan thlen chuan a kawng min lo kawhhmuh a, kawngkhar pakhat kan hma lamah sawn min  kawhhmuh dawn a ni,” a ti a. “Chuti chu kal rawh, i kal ang le, ka thian,” Thlemsama chuan a ti a. Chutichuan an kal dun ta a. Tin, Tihmawh chuan, ” Kei chu ka inah ka hawng leh ang, hetiang mi bum hmang leh mi a thian nih hi ka duh hrep lo ve,” a ti a.

Tin, ka mumangah chuan Tihmawha chu a lo haw leh ta a. Kristiana leh Thlemsama chu thukhawchang sawiin an kal dun a, hetiang thute hi an sawi a. Kristiana chuan, ” Thian Thlemsam, engtinnge i awm ? Nuam i ti alawm maw ? Ka hnena kal ve i tum avangin ka lawm e. Tihmawha pawh khan thil hmuh theih loh thiltihtheihna leh ka hlauhawm hriat angte hi hre ve sela chu min kirsan mai lo tur na a le,” a ti a. Tin, Thlemsama chuan, ” Khai le, thian Kristian, tunah chuan keimahni pahnih chauh kan ni ta si a, chu mi kan kalna tura thil thleng chu eng ang meuh nge maw a nih a, eng ang meuhva lawmna tur nge a nih min han hrilhfiah teh tawh khai,” a ti a. Chutichuan Kristiana chuan,” Thua ka sawi theih aiin ka rilrua ka ngaihtuahin a tha tih ka hre thei zawk; nimahsela hriat i duh em chuan ka lehkhabua mi hi ka han chhiar a nge,” a ti a. Tin, Thlemsama chuan,” Chung i lehkhabu thute chu a dik ngeiin i ring em ni ?” a ti a. Tin, Kristiana chuan,” Ring e, matheilovin a dik a ni, a siamtu chu dawt sawi thei lo a nih avangin,” a ti a. Thlemsama chuan,” Aw le, anih leh eng thilte nge ni le ,” a ti a. Tin, Kristiana chuan, “Ram boral thei lo luah tur a awm a, chu ram chu kan luah theih nan chatuan nunna min pe ang,” a ti a.

Tin, Thlemsama chuan, ” Thil dang engte nge la awm,” a ti leh a. Kristiana chuan,” Ropuina Lallukhum leh puan ni anga min ti eng thei kan nei bawk ang,” a ti a. Chutichuan Thlemsama chuan, ” E khai, a va nuam dawn em ! Eng thil dangte nge la awm ?” a ti leh a. Tin, Kristiana chuan,” Tahna te, lungngaihna te, a awm tawh lo vang a, chu mi hmun neitu chuan kan mittuite min hrukfai sak vek ang,” a ti a. Tin, Thlemsama chuan,” Chutah chuan thian eng angte nge kan neih ang le ?” a ti a. Kristiana chuan,” Pathian vantirhkoh ropui tak takte an ni ang a, tin, kan hmaa kal tawh mi tam takte kan hmu bawk ang a, tumah tihbaiin an awm lo vang a, zaidam tak leh  thianghlim tak vek an ni ang. Tin, mi tin Pathian mithmuhah chuan an awm ang a, a hmaah chuan kumkhuain an awm ang a. Tin, nula thianghlimte an rangkachak tingtangte nen kan hmu bawk ang; tin, Lalpa an hmangaih avanga he mi khawvela an thah te, an halhlum te, sakhawlh sehtir te, tuia an paih te, puan ropui sina thi theih tawh lova awmin kan hmu bawk ang,” a ti a.

Chutichuan Thlemsama chuan, ” Hengte hi a ngaiha ngaihthlak mai pawhin rilru a tilawm a ni; nimahsela chung thilahte chuan engtinnge kan lawm ang a, engtinnge kan chan ve ang ? ” a ti a. Tin, Kristiana chuan,” Chu mi ram roreltu Lalpa chuan he mi lehkhabuah hian a ziak a, chu mi chu kan duh tak tak chuan athlawnin min pe ang,” a ti a. Tin, Thlemsama chuan, ” Aw le, ka thian, heng thil hi ka hriatin ka lawm em em a ni, hawh i kal chak deuh vang,” a ti a. Nimahsela Kristiana chuan, ” Ka phurrit phurh hian ka duh tawkin min kal chaktir thei lo a ni,” a ti a.

Image credit


Bible i ngai hlu em ?

Bible engzat nge i kawl ? Sande sikul kaikim lawmman a i lak ringawt pawh  chhiar sen loh i nei ngei ang. I book shelf kil khatah i hung mai mai ang. I tan lehkhabu hlu an ni em le ? Saptawng chhiar thiam inih chuan version hrang hrang engzatin nge i book shelf  luahlum a, commentary engzat nge i kawl ? I chhiar ngai loh leh keu pawh i keu ngai loh atam zawk an ni em ?

Kristian i ni a, I bible nei lai kha i tan eng ang chiahin nge i ngahihlut a, i nun kaihruaitu a nih le ?

Bible pum keimahni tawng ngei kan neih bakah, Bible commentary tha tak tak chhiar tur kan neih mek lai hian,  anmahni pianpui tawnga Bible bu pakhat takngial pawh chhiar tur nei lo hnam tam tak an la awm.

I Bible kha lehkhabu pakhat ve maiah i ngai  hial tawh em ? Ahnuai video hi han en la, Bible ( Pathian Thu ) ngaihlutna leh A THU a riltamna thar apek ngei che ka beisei !

 

Kimyal tribe te chu, Indonesia ram West Papua ; Eastern Highland a hnam mawl ve tak te an ni. Kum 1963 hma lam zawng kha chuan; tu hriat an hlawh lo. Kum 1963 ah WTM – Chanchin Tha hril tu pawlin an tlawh pawh atanga mi hriat hlawh ve ta chauh an ni. Kum 1968 khan an zinga Chanchin Tha hril tum, misawonari pakhat phei chuan a matar phah nghe nghe. Pathian Thuah an tuihal hle a, kum 2010 khan, anmahni tawng ngeiin; Thuthlung Thar Bu pum chu an nei ta ani ! Tah hian chiang zawngin chhiar tur a awm : Kimyal Tribe


Ran hmanga inthawi

Ka khaw kalna thin pakhatah chuan ran hmanga inthawi hi an la ching hle a. An inthawina hmun hi; an khaw witch doctor thin thi ta thlan ani a. Heta hian kalin, sa leh thlaite, pawisa lem te kengin inthawina an hlan thin. An inthawina sa chu inah hawnin an ei thin. Damlo dam theih nante, tangka lama vanneihna an dawn theih nan te, an faten an lehkhazir tha taka an pass theih nante ani tlangpui.

He witch doctor thlan larna pakhat chu : Kum 14 vel kal ta khan ; pa pakhatin a fanu –taksa chanve zeng tawh tan inthawina arawn hlan a, thla 2 hnu velah a dam pui ta ani awm e.

Ngaihtuah peihte tan : Chhanchin Tha hril dan tha nia an sawi thin chu, mahni thil tawn ( testimony ) sawi ani thin. A dik viau nangin, experience emaw testimony chauhin awmzia aneih loh hun a awm fo thei. A fanu tan damna duh avanga, ran hmanga inthawia damna chhang hnenah khian —ISUAN a tihdam dan che han sawi eltiang mah la; “ Keipawh he thlana kan inthawina avang hian ka fanu a dam a lawm ! ISUA kher angai lo “ ati thei ngei ang. A ngaithlatu a zirin i thiltawn, testimony ropui tak emaw i tih kha, ran hmanga inthawina aiin a lo ropui lua lo thei tlat tihna anih chu !  THUTAK ( Truth ) tehna famkim atan hian experience leh testimony hi atawk lo .

Sacrifice

Sacrifice

Khaw thenawm atang leh province dang atangte pawhin he thlana inthawina hlan tur hian an rawn kal thin.

Inthawi


Hna awlai lo !

Tawnglettu pawimawh zia an sawi leh an ziahte pawh ka chhiar fo tawh thin. Nimahsela, thil reng reng hi mahni’n tawnve phawt loh chuan afiah tawk lo fo thin. Kum 2007 November thlaa, Chinese thalai rualin Mizoram an rawn tlawh tum khan an tawng ka lo leh sakve a.

Lengpui Airport-ah kan lo dawng sawng a; anmahni lawmna hun tawite kan hmanga. Chinese Team  hotupa thusawi chu , Chinese atangin Mizo tawngin ka letling a; chung ka lehlinna tawngkam chu angai ngaiin atukah—chanchinbu front page-ah a rawn chuang ta kulh mai a ! Khata tang khan tawnglettute pawimawhzia hi atakin ka hreve tan tain ka hria !

Hna awlai lo :

Zanin ( 1.5.11 ) hian kan thiannu Chinese; Chinese tawng min zirtirtu  chuan pasal anei a. Pasal atana aneih hi American ani a, Chinese tawng athiam loh avangin leh kan thiannu thian loh kal tam zawkte hian Saptawng an thiam loh avangin, inneih inkhawm chu bi-lingual atih angai a.

Keichu English to Chinese letling turin min ngen a. Ka hna chu tlin tumin ka inbuatsaih ve ta a!

Mo chu a unaupa in a rawn kai lut a, aisle chanve-ah an ding a; moneituin stage lamah a hruai dawn chiah tihah chuan mo unaupa chu, ” Music kha ti tawp rawh u ” tiin a au ta tuarh mai a ! Kan hawi phawk nasa hlawm kher mai. An background chipchiara hretu ka nihve avangin ka hlauthawng kher mai.

” Tawng lettu kha hetah lokal teh se ” ati a. Tichuan an bulah chuan ka ding ta ran a. Mo unaupa chuan, moneitu pa chu kut zungchala kawng chhungin, ” SAP ( foreigner ) inih avangin, ka unaunu hi i duh duh a i bum a, i ching phar theihah ngai suh ang che. I bum anih vaih chuan, ka that ang che…” ati ta mai.

Mo mittui chu a sur hian asur zung zung a. A hlimna ni tur ber chu alungchhiatni leh atahna niah achang ta ! Asawi ang anga leh chu thiltih chi bera ka ngaih loh avangin, ” Duat takin enkawl la, hmangaih la, thlahthlam ngai suh ang che “ tiin ka thiam angtawk chuan ka tlip ta a.

Moneitu chuan aw dam  takin,  ” I unaunu hi ka nunna aiin a pawimawh nep chuang lo. Ka hmangaih a, ka thlahthlam ngai lovang tih ka tiam a che ” ati a.  Stage lam chu an pan ta a !!

MO background :

Kan Chinese thiannu hi, hmeichhia anih avangin a nu leh paten an duh lova, Kum 2 mi anihin — an hmelhriat chhungkaw khawsa thei deuh zawk hnenah an pe a. Hemite chhungkhua hian an fa angin an la ta a.

Kan thiannu hi Collage akal laiin, Chinese Kristian baibul pek a chhiar atangin Kristianah a inpe a. Kristian ani tih a chhungte a hrilh ni chuan, apa chuan; ” I a ta ani e “ tiin,” Kristian sakhua i phatsan / bansa leh hma chuan College pawh i kal tawh lovang ati ta bur mai si a. ”

College zir zawh ve ngei a duh bawk si a. Kar hnih aral chuan, apa hnenah Kristian sakhua a bansan tur thu a hrilh ta a.  Nimahsela Pathian thlarau chuan a awmpui reng a. College-a akir leh hnu thlakhat chhung chu amumangah; Isua hian a hnena kir leh turin alo sawm thin a. Atawp atawpah chuan a nun chu Isua hnenah ahlan thar leh ta a.

Tichuan, anu leh pate hriatpui lohvin Kristian kum khat chhung chu ani ta a. Pathian pawn an fellowship ho zingah pawh a hmang hle a. A roommate pa 3 -te chu; kum chanve chhungin ringtuah a siam nghe nghe a.

Chutia anu leh pa-te hriat lohva Kristian nih reng chu tha ati lova. Engpawh huamin anu leh pate chu ahrilh leh ta a. Chuta tang chuan anu leh pate hian an tuithlar ta a ! Semester break pawn an inah a hawn an phal ta lo! A vakvai chu ani ta der mai ! Nu leh pa dik tak ten an duh loh pawh a vanduaithlak a, arapthlak tawh tehlul len!

A inkhawmna thin, kohhran hotute pawn palai vawi tam tak tirin remna thu sawi an tum tawh thin a; engmah awmzia anei thei chuang lo.

Nikum kumtir atang khan helaia  rawngbawla rawn awm ve, American pa nen an inngaizawng ta a. Nupa a insiam te hial an duh tak avangin, min enkawl seiliantute chu hrilhve ngei atha e, tihthu hlaah; kan thiannu nu leh pate hi an hrilh ve a. Pasal aneihtur an hriat atangin, lawmpui ahnehin anchhia chi tinreng an lawh a. A unaupa phei hi chuan thah-ah te hial avau nghe nghe !

Hetia pasalte aneih dawn takah chuan tiin, a mipa lam atang ang zawngin; an fanu dil tur leh remna siam tumin, kei leh kan thawhpuipa pawh kan thiannu nu leh pate hmu tur hian kan lo thawkchhuak tawh a. Kan hlawhchham chiang hle !!

Hmangaihna chu engmahin then thei hek suh. Inneih chu an ti tlu ta a.  An inneih hma niin, a unaupa chuan inneihna  rawn tel aduh thu a rawn hrilh lehhnuhhnawh tak avanga; vawiin inneih niah pawh rawn tel ve leh ta a—afarnu pawh rawn hruai lut ta kha ani a !

Vawiin ni a, athusawi a sawi anga ka lettling lo pawh kha ka inthiam lo em em ta lo. Ka hna chu ka hlen lo chu nimahse, ka inchhir hran lo.

 

Tawng lehlin hi thil namai alo ni lo !


Two Wheeler Taxi

Tun hnaiah Mizoram Transport Dept thuchhuak Vanglaini-in atarlan dan chuan:

Two wheeler taxi hmang hian thalai lehkha thiam hna nei lote harsatna sutkian tum a nih bak ah, miin an tumna hmun rang zawka an thlen theih phah dawn avangin he ruahmanna hi an siam niin an sawi a. Heng permit pek chhuahte hi fimkhur taka kalpui tur anih tur thu an sawi bawk a.

Ruahmana fel tak leh dan khauh taka lek-kawhna hnuaiah chuan athat phiante ka’n ring ringawt a. Thailand, Laos, Vietnam leh China-ah te hian an uar phian. China ah hian khawpui lian deuhvah chuan khawpui pawn ah hlir an tlan tir thung.

Twowheeler taxi

A chung te an vuah chawp a, nisa deuh ah chuan atha phian!

Khaw te deuh ah chuan tlemin an thlah zalen deuhva. Thingtlang lamah chuan inkalpawhna hmanrua  awlsam tak pakhat ani.

two wheeler taxi

An stand-ah an dingve thap mai.

Heng motorcycle taxi / two wheeler taxi hmanga eizawngte hi lehkhathiam hnaneilo chu an ni lem lo. Kan ramah chuan lehkhathiam chin khalh tur ani bawk a, fimkhur dante pawh an thiam deuh turah han ngai phawt ila.