Chhurbura roh em em; Nahaia'n neihsak phet a tum!

Religion& Spirituality

Pornography leh Kristiante 

Nikum 2009 khan Aizawl veng pakhata ; Tleirawl Inkhawm za sawmnga vel zingah — Pornography en pawina emaw athat lohna emaw i hria em? tih leh, I en thin / tawh em ? tia ka zawhna siam chu ; thalai 150 zingah 136 chuan athatlohna ka hre lo tiin min chhang ! An hrelo tak tak anih pawh arinawm. Tleirawl leh rawltharte, naupang zawkte chauh kan ni lo; puitlingte pawh  hian apawina lam aiin fimthu deuhva lain; kan lawm ru zek. Mizo website lar lawrkhawm leh Mi(sual) a, hetiang lam topic alo awmchang a kan comment duh dan atangte pawh hian a hriat viau awm e! 🙂

Hman deuh khan zaithiam pakhat a bialpa nena an in fawp lai thlalak chu thehdarh ani a. Officer leh mipuitling tak tak, kohhran upa te, KTP hruaitu thenkhatte khan  an  xerox / photocopy sup sup nia maw le ! Eng atan ngemaw an tih ni ? Mizote hian mipat  hmeichhiatna leh sex kaihnawih hi in zirtirna kan thlachham khawp mai. Handset a, hmeichhe ruak deuh keng kung thlalakte, mi sex video neihte chu intihtheih nan kan hmang ta zawk zawmah emaw ni!

Kan changkang zela — VCD/DVD, computer, mobile phone te duhthala hman theih kan neih chinah phei chuan hetiang flim thalo leh milem-thalo hi kan kutzalah duhtawka kan en theih turin alo awm ta. Kan handset te, kan laptop computer leh hard drive-te chu  flim thalo tak takin a khat ta tuk mai.

Engpawhnise, khawvel changkanna hi kan dan theih ani lova, kan hmehmih theih ani lova; kan tum tur pawh ani hek lo. Hetih karah hian kan fate, kan naute — kan zirlaite hi engtiangin nge kan fuih a, kan zirtir le? Kan thalai tam tak hian hetiang film tha lo enpawina hi an hre lo a nih nghat phei chuan, a pawizia leh a that lohzia hrilh hriat hi kan tih makmawh ani. Nge, anmahni entawntlak leh zirtir thei miah lo hian keini an ute ; nu leh pate pawh hian  apawina leh athatlohna hi kan lo la hre lo zawk  ?

Tute nge Film thalo en thin ?
Heng film thalo en thinte hi kan ngaihdan maiah chuan mi-inthlahdah leh awmthaduhlo, misual nia kan sawite tihturah kan ngai mai thei. Chungmite chauh chu an lo ni lo. Mifel, mithianghlim, kohhran mite– mi piangthar tha tak tak nia kan ngaihte zingah pawh a hluar hle alo ni. Kum 2002 khan,  The Purpose Driven Life lehkhabu ziaktu — Rick Warren website ; pastor.com -in an survey atarlan dan chuan: Pastor 1351 zinga 54% chuan kum kalta chhung khan ‘ internet pornography ‘ an thlir a.  30% -te chuan, ni 30 kalta chhung khan an thlir. Pastorte pawh an bang chuang lo anih chu! Aizawl kohhran lian ho hian, rawngbawltu kan tih zingah survey han neive tase, kan statistic hi a chhuanawm lohviau mai lawng maw !?

Baibul in engtin nge a  sawi ? :
Keini Kristian-te chuan kan tehna hmasa ber tur chu Baibul-in engtinnge  asawi tih hi ani awm e. 1Korin 6:8 – ( KJV ) chuan, ” Flee from FORNICATION “ . Heta ‘ fornication ‘ hian sex hman khawlohna lam chi reng reng – uirena, mawngkhawhurna, ran hmanga sex hman, bestiality, incest  a huam vek .  Fornication hi  Greek tawng ‘ Proneia ‘ tih ani a, chu chu tuna Pornography thumal lochhuahna hi ani.  Baibul chuan —  ‘  pornography chu Tlansan rawh u’  ; hetiang lam reng rengah hian inhnamhnawih suh u ati ani. Tin, 1 Korin 6:9-ah chuan , Pathian ram lut lo tur asawi zingah  fornicators hi a tel bawk.

Kan Pathian hian, sex man khawlohna  hi a haw hle a; angai zam mai mai lo. 1Korin 10:8-ah chuan, “ Neither Let us commit fornication, as some of them committed, and fell in one day, twenty three thousand (conf: Num. 25:9 ) ” . Mi 23,000 -te chu  an nunna chawplehchilh-in a la nghal hmiah.


Morally Wrong :

Kristiante thlirna atang chauh lo pawhin, mihring chiat leh tha hriatna atanga ngaihtuah pawhin thil thalo leh dik lo ani tih chu hairual ani lo. China ram communist sorkar, Pathian awm pawh ringlo ram chuan–Kum 2008 atang khan : An ramite rilru leh ngaihtuahna alo hrisel zawk theihna tur ngaihpawimawhna avangin — pornography website  tihchiat lamah beihpui athlak a, website sang tam tak ati chhia a. An search engine ah pawh- ‘ porn ‘ ( Chinese word ) tih chu an block tawp mai ani.

English Corner a Chinese University zirlai lokal thinte zingah survey chi hrang hrang kan buatsaih thin a. Kum 2006 khan; zirlai 300 zingah  pornography chungchang ah survey kan nei a. Zirlai 250 te chuan, ” Pornography en hi atha lo” , tiin an chhang. Heng zirlaite hi kristian an nilova, sakhaw vawn nei lo vek an ni . Heng atang ringawt pawh hian  pornography  hi thil thalo leh diklo ani tih chu a chiang viau awm e.

Kristian nilo zawk leh Pathian awm pawh ring loten sual;  thilthalo leh dik lova an ngaih hi keini Kristiante phei chuan kan do bur zawk tur ani. Hetiang ah hian kan inthiarfihlim tur ani a. Inthiarfihlim turin  midangte pawh kan zirtir zawk tur ani ang.

Chhungkua leh Nupa kara harsatna thlentu :
America leh khawvelah pawha hriat lar;  Focus On Family : Dr. James Dobson a pawlte chuan, chhungkaw 47% -te chuan, pornography hi an inchhunga harsatna thlentu lian tak ani an ti a [ Focus on the Family , Pool, October 2003 ] Kum 2005 March thlaa, Christianity Today-in ” Kristiana leh Sex ” tih zirchhianna; pastor 680 leh midang 1,972 -te hnenah anei a. Chuta tanga alan dan chuan: Tun hnaia chhungkaw buaina tam ber 60 % chu  pornography/ internet pornography vang ani an ti.

Tunlaia nupa innghirngho-na lian tak pakhat chu, ‘ internet pornography ‘ hi ani. ( Heihi kan ramah ani ve em ka hre chiah lo ) Tam tak ten, fiamthu titak deuhvin ; ” Zei lo deuh nupa chuan puitling film en atha  ” an ti thin. Hei pawh hi ngaihtuah chian chuan thurawn atthlak tak ani . Thil tha tak ni se,  professional counsellor tam ber te hian an thurawn ah an telh ngei arinawm. Zei phah nan a hman aiin, in iaina  thlentu mai ani.

Christian Counselling Today in, nupa 500 a survey ah chuan; nupa 60 % te chuan — an khawpui ten pornography an hman thin avangin anmahni an inenhniam phah a. 70% te chuan, an kawppuiten pornography an hman / en thin avangin anmahni an in iai phah niin an sawi . [ Marriage Related Research, Mark A. Yarhouse, Psy.D.  Christian Counseling Today, 2004 Vol. 12 No. 1.  ]

I nupui emaw i pasal emaw khan, midang nang aia hmeltha  zawk kha thlir doh doh fo mai se engtinnge i ngaih ang ? Chung thlalak / milem te enchung chuan; a mah leh amah in hrikthlak nante hial hmang fo se engtinnge i ngaih ang le ? Nagmah aia tilawmtu dang a awm i phal em ?

Sex hi nupa karah chauh hlim taka hman tur ani. Kan nupa karah lust -in hmun a chan len zawk fo chuan kan nupa kar nun chu angaihtuahawm hle tihna ani. Chutiang bawkin, kan khawpuite aia midang kan thlakhlelh chinah tawh chuan, kan nupa kar a kak thuk hle tawh tihna ni ang.

Tlipna :
Pornography lam chi reng reng, megazine , VCD/DVD , internet, thlalak lakah hian keini Kristiante chu kan inthiarfihlim tur ani. Kan taksa hi ‘ Pathian In ‘ anih tawh avangin, chumi tibawlhhlawh thil reng reng chu kan phal tur ani lo.  Kan Baibul-in min ngen angin; Pornography lam leh sexual perversion lam reng chu kan tlansan ngam tur ani. Kan ramah pawh hetiang pornography hian bu a khuar thuk tawh hle. Nang leh kei hi kan fihlim em le ? I fihlim lo anih chuan Pathian duh loh zawng ti i ni : ngaihdam dila, sim ngei ang che.

In Hun ti thianghlim la, Lalpa pawl fo rawh !

Advertisements

[ Chuktuah Huan ]

Chuktuah huan tih tham ani mawlh lo! 🙂 Chuktuah huan chu, lo atana an neih thin aiin ate deuh zawk a; leipui angin a kumkhlun lo deuh zawk bawk.

Hmanni ah Pu Zothana website ah a huana thlai tui hnai tak tak atharte ka hmu a. Durtlang Saphal rama lo kan neihve thin laite minthlain a hmu uarh urah a. Huan siamve theih min tichak hle. Apartment anga inluah tan chuan angaihna a awm der silo.

@ Pic : Bean, bai chai ( Chinese cabage ? ) leh corriander ka ching ve. A thar hun ka nghakhlel der mai 🙂

Thlai pahnih khat pawh a tih to theih takin tiin, kan balcony kil khat chu, ka chhuktuah huan (?) atan ka valhve ta tawp mai ! 🙂 Lei a awmsa lova. Khaw pawnah ka va kal a, miin huan an siamna hung pawn ami lei ka hmuh ang ang chu ka va rut ve tawp mai a. Chutia ka ruh mawlh malwh lai chuan, pitar pakhat hian min rawn hau ta bawrh bawh mai a. ” Ngatinge min dil lova lei i lak rikngawt ? Ka fine tir dawn che ..” ati a. Saptawngin ka chhang lui tlat a. Nakinah chuan tihngaihna a hrelova, ” Foreigner mawl…” tiin min kalsan ta a.

China-ah hian, an tawng thiam a pawimawh em em rual hian, tlem a an duhsakna emaw an hauh te duh lohna ah chuan, an tawng thiam lo hi a pawi loh chang atam mai 🙂


[ Inneih Inkhawma Lengkhawm Hla Sak Hi ]

Kristian kan nih hma a, Mizo Inneihna kan lawm dan hi ka hre thui vak lo. Kristian kan nih hnua biakina kan lawm dan pawh hi a inang lo hle hlawm a. Kohhran azirten a danglam a; tin, innei tur ate duh dan a zirin lawmdan leh, inkhaihhruai dan te pawh hi a danglam thei viau awm e.

Tun hnai khan, Synod Revival speaker thianpa chuan nupui a nei a, mo leh moneitu, leh an thiante chuan Mizo takin, Mizo kawr leh puanchei, vakiria thlengin an khim anih kha. A mawi dangdai hle. Kan inneihna te pawh hi, Mizo taka kan chhawm nun thiam chu atha khawp mai.
A laia putar hi a Halelui ring thei khawp mai!

Pic credit : Mamuana Sailo

Tin, inneih inkhawm ah hian atlangpui solfa hla kan tih mai hi kan sa deuh ber a. Mizo lengkhawm hla / khuang hnih hla sak erawh hi chu kan ching lo khawp mai.

Hmannia Aizawl veng pakhata inneihna-ah chuan, inneih inkhawm tan-na hla atan, lengkhawm hla; ” A Hmangaihna a ka chawlhin ” tih, moneituin a thlan chu chu tui tak maiin kan sa a, lamtualah an lam suau suau mai a; aropui dangdai hle in ka hria. Kan sa tui bawk a, an la nawn nghe nghe. Inneih inkhawm a, lengkhawm hla an sak ka vawikhat hriatna ani nghe nghe !


Solomona Temple : Chawlhhmun

Ni 31.Jan. 2010 -khan, Solomona TempleKohhran Thianghlim ; thenkhatin Dr.Biakmawia Pawl tia kan hriat lar ho sak , Chawlhmun Aizawl-ami chu kan zuk tlawh a. A building pawh a ropui khawp mai. 

Artui pum khat mahnia eizo, mahni inhmangaih tia an sawisak thin thute. Kan naupanlai a; Sual Puan Zan an neih, kan ngaihthlak ruk thin thute, an khuang vuak ran zia leh an lam ran ziate, an kohhran memebr an thih pawn, khawtlang buaipui an duh loh thute leh YMA hminga buaipui an duh loh dante chu la ziak hman lo mahila, alem lam hi in dah hmasa phawt mai teh ang hmiang !

Main entrance

He Temple sak dan leh an sak chhante leh a senso tlawhtute hriat turin an tar kalh mai!

A chhung chanve. A nawm hmel dup dup khawp mai !

Khawtlang lam atangin

Khawchhak lam

A khawngkar pui ber chunga vantirhkoh tawtawrawt ham lai! A lunglen thlak phian mai !


[ Zan Duhawm – Vohbikte Runah ]

Krismas vuakvet lai ani a, boruak ri hulh hulh hriattur a awm reng a. Hemi zan ngat phei hi chuan thawm atam hle. SA thalai hovin an buatsaih, Coffee Night a kalte thawm pawh chu, step zim tak leh chhuk em em mai a kan kal lai pawh chuan kan hre phak a. Kan piah lawka mithianghlim -thlankhawm niawm tak amawi, Kristian Thalai inpawlkhawm hla sak mek ; “ Kan Hneh ngei dawn ani, Lal Isua hmachhuanin ” ‘ Boral mekte chhanchhuak thuai rawh u ‘ tia mawi taka an sak rual dual dual-te chu kal pah chuan ka zawm ve rat rat a! Hnehna chu biakin-ah puang mai lovin, Lal Isua hmachhuanin kan kawng zawh lam, step zim-te, mi kawmkar chu rawn zawhve ta zawk se aw — te ka ti rilru mai mai a !

Evangelical Cell– a kan inhmang tak tak laia ; kan veng leh Aizawl kawmkar ami, mi hla zawkte kan hrut chhuah hunlai te kha mithlah-ah hian alang uar uar bawk a. Ka rilru tak chuan ka lung aleng ru hle nghe nghe a.

Ka thianpa chuan, Khuti laia bati eng teng teng-na khu ani ang ati a. A thlang deuhva sethlam, lian vak lo chu kan pan ta a. Chu ina awm te pawh chuan thawm an lo nei laih laih a. An thawm erawh, Chhandamtu pianna lam leh a kaihnawih lam hawi reng reng ani lo. Ka share ve tur chu khawi- ah nge “ Ka pawisa thawh kha ka la let dawn ” “ Zan -in bak chu ka kawp peih tawh lo che. I sum lo ve rapthlak si “ Zawnga , zawngi tite chuan an au lawng lawng bawk a.

Zuk fina, kan thil hriat duhte han zawh chu kan thian dun chuan kan hreh kher mai. Ka thianpa chuan, nang hmuipuipu deuvah lut hmasa rawh a tita tlat mai si a. An thawm atang chuan engang mi nge an nih a hriat renga. YMA duty emaw, VDP Duty emaw min lo tia nga, pahnih chauh kan ni bawk sia, min lo sawisa mai anga tihte chu rilru -ah a awm a.

Ka insang phek a, kawng ka chu kan kika ; an reh ta thiap mai a. An bati chit pawh chu an chhem hlum nghal ni ngei tur ani. A thim ta thiap a. Kan ding vang vanga, keichuan, ” Man tum che u a lokal kan nilo. VDP duty, YMA duty kan nilo. Thil engngemaw zawh duh che u kan nei mai ani “ kan tih hnu atanga rei vak lovah chuan. Hmeichhe aw hian, “ Anih tute nge in nih ? In insawiloh chuan kan hawn dawn lo che u ” a rawn ti lar lar a. Ka thianpa chuan, rang deuh hian, “ Missionary kan nia “ ( Ani zawk tak phei chu sorkar hnathawk ani ) an lo ti mai pek a. Khatianga in hmelhriattir kha tul ka ti lo khawp mai. Mahse asawi tawh si !

Nulian vak lo, sa nei deuh, hmelchhe lemlo tak hian kawngka chu a rawn hawng ta a. Kan kal chhante kan hrilh a, kan mizawn thlalakte chu kan han hmuh a. An hmuh ngai loh thu min hrilh a.

An inchhung luh hram chu ka chak a. Tuiin kan dil a, ani chuan hawihhawm deuh hian “ Missionary luhna tlak ani lo ” ati a. “ Missionary-te luhna tlak loh in ka lo hmu lo re re ” fiamthu deuh hian ka ti a . Chutihlai chuan, inchhung lama tlangval pakhat chu a lo chhuak a. “ Khu kan thiannu khu a OD dawn a rawn tawngtai teh ; Missionary I nih chuan a rawn ti khar khar a “ A rui hle tawh tih chu hai rual ani lo.

Kan lut ta a, bati chu an chhi enga, kan rin aia tam daih mai an lo ni. Duhthuhmun, mipa leh hmeichhia sawmhnih rual hi an lo inkhungkhawm chu niin. An damdawi tihna hmanruate, zu funa sarang te chu alet rem rum bawk a. A then chu, in haw lo tih hriat tak hian an lo inkuah chial hlawm bawk a.

A sir deuhvah chuan, an thiannu chu thawmhnaw phelh deuh kung hian a lo mu a, a huh hluam bawk a. Tlangval chuan, “ Kha kha anih kha, rawn tawngtai teh ka tih chu ” ati a. ” Ka tawngtai in duh tak tak maw ? “ ka ti a. “ I ngam phawt a thu le ” an ti a. “ Anih ka tawngtai hmain, thu tlemte ka sawi thei a ngem ka ti a ” An phal avang chuan, minute 5 vel awm hi – Pathian Hmangaihna thu tlem ka sawi a. Tawngtai tur chuan nula lam chu kan thian dun chuan kan pan phei a.

Nula chu kan han bia a, mumal awm lutuk lo hian a rak a. Kan thian dun chuan a chalah kan dawm a, abulah chuan kan thingthi a, kan tawngtai ta a. Kan tawngtai rei lo. A rawn luak ta bawrh bawrh mai a; kan kekawrah chuan a luak chu a kai nuiah mai a . Atui awm duh lo kher mai!

A hnu rei lote-ah chuan a rawn harchhuak a, kan inkawm zui nual a. A phone numberte min pe a. A rui phur thenkhat chuan, min lo tawngtaive rawh an ti a. A zavai atana tawngtaisakna kan thiandun chuan kan nei ta a. Ka phone numberte min dila, hlim takin kan tin san ta a.

Kan hawn kawngah chuan kan thian dun chuan, Emmau Dai- a thian dun ang mai khan, ‘ var deuh huai ‘ hian kan inhria. Kan rama thalai tam tak hetiang kawng zawh mekte tana hun pum a thawh mai kan chak thute. Kohhran / Thalai pawl-te pawh hian, heng hunpui laite hian anmahni thleng phak a, rawngbawlna kalpui trul nia kan hriatte chu kan sawi dun bawrh bawrh a. Biakin leh Hall vela, afel tawhsa te te , inchhek-arbawma, ‘ Hnehna Puang chhuak rawh u ‘ ‘ Boral mekte chhanchhuak thuai rawh u ‘ tih rikngawt maite chu kan duh khawp lo thar ta em em mai a! Hemi zan hian keini thiandun pawh hi, anmahni tlawh tur hrim hrima chhuak lo ni ta ila aw, kan ti zui vawng vawng a ! Kumhlui thlah zan chuan eiturte kengin kan tlawh leh ta a !

Ni e, mihla / misual zawk nia kan ngaih te hi, keini rawngbawltu-te pawh hian kan pan zawk tur ani a, anmahniin min pan zawk tura kan beisei tlat hi a tawk lo ani. Aizawl khawpui dai leh veng kawmkar deuh han hrut chuan, hetianga damdawiti-te, nunkhawlohna kawng zawh mekte tawmkhawmna hi avan lo tam sawt ta em !!

Mizoram kohhran / Kristiante hian kan rawngbawlna huang kan zauh avan hun ta em !