Chhurbura roh em em; Nahaia'n neihsak phet a tum!

Adventure

Paihper leh Khuang : Vietnam

Hmanni khan Vietnam  ka va zinnaah paihper leh khuang bazara an lo zuar hi ka hmu a. Vietnam ho nen hian kan inang viau va, a Vietnamese tak nilo; tribal ho hi kan ang lehzual bawk.

Paihper

Paihper ni ngeiin ka hria

Khuang

Khuang

Khuang chi hrang hrang hi SE Asia-ah hian nei an tam hle a, mahse a kaih dan hi a dang teuh va.Hei erawh hi chu Mizo khuang te nen pawn a inhnaih ve viau hmel !


Mi te park

Kunming Yunnan Province, khaw pawn deuhvah hian, mi te ( dwarf ) park a awm a. Province hrang hrang a mi te; sawm 90 vel an cheng. Mi te ho eizawnna siam sakna chi khat atana siam ani a. He park tlawhtu te tan hian zai te, qigong, lam leh an thiam thil chi hrang hrangte an lo en tir thin. He park a luhman hi, 80 rmb ( Rs. 600 vel ) ani. He park a cheng leh thawk mi te te hian thlakhatah; 1000 Rmb (Rs.7000 vel ) an hlawh ani awm e.

He park an siam tirh khan, human rights lam atanga sawichhiatna atawk nasa viau. A dikna chen a awm mai thei. Tawng mawi lo ni suh se, mi piansualna, pianphunga an rualban tawk lohna tlir tura mi tam tak han punkhawm chu engngemaw zawng tak chuan thil nuam ani lo. Chutihrual erawh chuan, pianphung arual ban pangngai pawn, thlakhata 1000 rmb hlawh pha lo hi China-ah hian atam zawk an ni lawi si. Tih luihna a dah an ni lova, anmahni duhthlannaa awm an ni.


Ran hmanga inthawi

Ka khaw kalna thin pakhatah chuan ran hmanga inthawi hi an la ching hle a. An inthawina hmun hi; an khaw witch doctor thin thi ta thlan ani a. Heta hian kalin, sa leh thlaite, pawisa lem te kengin inthawina an hlan thin. An inthawina sa chu inah hawnin an ei thin. Damlo dam theih nante, tangka lama vanneihna an dawn theih nan te, an faten an lehkhazir tha taka an pass theih nante ani tlangpui.

He witch doctor thlan larna pakhat chu : Kum 14 vel kal ta khan ; pa pakhatin a fanu –taksa chanve zeng tawh tan inthawina arawn hlan a, thla 2 hnu velah a dam pui ta ani awm e.

Ngaihtuah peihte tan : Chhanchin Tha hril dan tha nia an sawi thin chu, mahni thil tawn ( testimony ) sawi ani thin. A dik viau nangin, experience emaw testimony chauhin awmzia aneih loh hun a awm fo thei. A fanu tan damna duh avanga, ran hmanga inthawia damna chhang hnenah khian —ISUAN a tihdam dan che han sawi eltiang mah la; “ Keipawh he thlana kan inthawina avang hian ka fanu a dam a lawm ! ISUA kher angai lo “ ati thei ngei ang. A ngaithlatu a zirin i thiltawn, testimony ropui tak emaw i tih kha, ran hmanga inthawina aiin a lo ropui lua lo thei tlat tihna anih chu !  THUTAK ( Truth ) tehna famkim atan hian experience leh testimony hi atawk lo .

Sacrifice

Sacrifice

Khaw thenawm atang leh province dang atangte pawhin he thlana inthawina hlan tur hian an rawn kal thin.

Inthawi


Nuho Insawizawi — Taijiquan

Chinese ho hian insawizawi hi an uar hle a, park leh hmun rem deuh laiah chuan insawizawi dan chi hrang hrang hmanga insawizawi hi;  zing leh tlaiah hmuh tur an awm reng. Upa lam tawhte hlei hlei hian an uar a! A huho ten music play-in inthehthril nasa thin. An insawizawina lar tak pakhat chu TAIJIQUAN hi ani a. Pitar putar park vela, taijiquan lo bei dalh dalh mai pawh hmuh tur an awm fo !

taijiguan

An master a ding ta vang mai

Taijichuan

taijichuan

An tar tawh viau nangin, an la fit khawp mai!

Taijiquan master


Ui Insual

Ui insual hi ka la hmu tam lo khawp mai. Abikin ahranpa ngata; UI INSUAL tir hmanga intihsiak phei hi chu ka la hmu miah lo. Kan awmna province-ah hian, ui insualtir hi an uar phian mai a. Vawiin kan zin kawng kan paltlang khaw pakhatah; Ui insual competition leh Lawi Insik Competition an lo nei a. Tun tumah hian Ui Insual thlalak thenkhat kan chhawpchhuak phawt ang a,  Lawi insi / in sual chu next post atan.

Ram thenkhatah, sahmul hmanga siam silhfen pawh inbel an phal mang tawh loh laiin; ram thenkhatah chuan hetianga, ran insual tir te an la uar em em thung si a le! Ui Insual hi  thenkhat tan chuan hmuhnawm ani mai thei e; nimahsela, an ha hriam tak hmanga, an inseh ri chak chak lai tuiti taka en chu harsa ka ti phian mai !

dogs fighting

dogs fighting

dogs fighting


Hna awlai lo !

Tawnglettu pawimawh zia an sawi leh an ziahte pawh ka chhiar fo tawh thin. Nimahsela, thil reng reng hi mahni’n tawnve phawt loh chuan afiah tawk lo fo thin. Kum 2007 November thlaa, Chinese thalai rualin Mizoram an rawn tlawh tum khan an tawng ka lo leh sakve a.

Lengpui Airport-ah kan lo dawng sawng a; anmahni lawmna hun tawite kan hmanga. Chinese Team  hotupa thusawi chu , Chinese atangin Mizo tawngin ka letling a; chung ka lehlinna tawngkam chu angai ngaiin atukah—chanchinbu front page-ah a rawn chuang ta kulh mai a ! Khata tang khan tawnglettute pawimawhzia hi atakin ka hreve tan tain ka hria !

Hna awlai lo :

Zanin ( 1.5.11 ) hian kan thiannu Chinese; Chinese tawng min zirtirtu  chuan pasal anei a. Pasal atana aneih hi American ani a, Chinese tawng athiam loh avangin leh kan thiannu thian loh kal tam zawkte hian Saptawng an thiam loh avangin, inneih inkhawm chu bi-lingual atih angai a.

Keichu English to Chinese letling turin min ngen a. Ka hna chu tlin tumin ka inbuatsaih ve ta a!

Mo chu a unaupa in a rawn kai lut a, aisle chanve-ah an ding a; moneituin stage lamah a hruai dawn chiah tihah chuan mo unaupa chu, ” Music kha ti tawp rawh u ” tiin a au ta tuarh mai a ! Kan hawi phawk nasa hlawm kher mai. An background chipchiara hretu ka nihve avangin ka hlauthawng kher mai.

” Tawng lettu kha hetah lokal teh se ” ati a. Tichuan an bulah chuan ka ding ta ran a. Mo unaupa chuan, moneitu pa chu kut zungchala kawng chhungin, ” SAP ( foreigner ) inih avangin, ka unaunu hi i duh duh a i bum a, i ching phar theihah ngai suh ang che. I bum anih vaih chuan, ka that ang che…” ati ta mai.

Mo mittui chu a sur hian asur zung zung a. A hlimna ni tur ber chu alungchhiatni leh atahna niah achang ta ! Asawi ang anga leh chu thiltih chi bera ka ngaih loh avangin, ” Duat takin enkawl la, hmangaih la, thlahthlam ngai suh ang che “ tiin ka thiam angtawk chuan ka tlip ta a.

Moneitu chuan aw dam  takin,  ” I unaunu hi ka nunna aiin a pawimawh nep chuang lo. Ka hmangaih a, ka thlahthlam ngai lovang tih ka tiam a che ” ati a.  Stage lam chu an pan ta a !!

MO background :

Kan Chinese thiannu hi, hmeichhia anih avangin a nu leh paten an duh lova, Kum 2 mi anihin — an hmelhriat chhungkaw khawsa thei deuh zawk hnenah an pe a. Hemite chhungkhua hian an fa angin an la ta a.

Kan thiannu hi Collage akal laiin, Chinese Kristian baibul pek a chhiar atangin Kristianah a inpe a. Kristian ani tih a chhungte a hrilh ni chuan, apa chuan; ” I a ta ani e “ tiin,” Kristian sakhua i phatsan / bansa leh hma chuan College pawh i kal tawh lovang ati ta bur mai si a. ”

College zir zawh ve ngei a duh bawk si a. Kar hnih aral chuan, apa hnenah Kristian sakhua a bansan tur thu a hrilh ta a.  Nimahsela Pathian thlarau chuan a awmpui reng a. College-a akir leh hnu thlakhat chhung chu amumangah; Isua hian a hnena kir leh turin alo sawm thin a. Atawp atawpah chuan a nun chu Isua hnenah ahlan thar leh ta a.

Tichuan, anu leh pate hriatpui lohvin Kristian kum khat chhung chu ani ta a. Pathian pawn an fellowship ho zingah pawh a hmang hle a. A roommate pa 3 -te chu; kum chanve chhungin ringtuah a siam nghe nghe a.

Chutia anu leh pa-te hriat lohva Kristian nih reng chu tha ati lova. Engpawh huamin anu leh pate chu ahrilh leh ta a. Chuta tang chuan anu leh pate hian an tuithlar ta a ! Semester break pawn an inah a hawn an phal ta lo! A vakvai chu ani ta der mai ! Nu leh pa dik tak ten an duh loh pawh a vanduaithlak a, arapthlak tawh tehlul len!

A inkhawmna thin, kohhran hotute pawn palai vawi tam tak tirin remna thu sawi an tum tawh thin a; engmah awmzia anei thei chuang lo.

Nikum kumtir atang khan helaia  rawngbawla rawn awm ve, American pa nen an inngaizawng ta a. Nupa a insiam te hial an duh tak avangin, min enkawl seiliantute chu hrilhve ngei atha e, tihthu hlaah; kan thiannu nu leh pate hi an hrilh ve a. Pasal aneihtur an hriat atangin, lawmpui ahnehin anchhia chi tinreng an lawh a. A unaupa phei hi chuan thah-ah te hial avau nghe nghe !

Hetia pasalte aneih dawn takah chuan tiin, a mipa lam atang ang zawngin; an fanu dil tur leh remna siam tumin, kei leh kan thawhpuipa pawh kan thiannu nu leh pate hmu tur hian kan lo thawkchhuak tawh a. Kan hlawhchham chiang hle !!

Hmangaihna chu engmahin then thei hek suh. Inneih chu an ti tlu ta a.  An inneih hma niin, a unaupa chuan inneihna  rawn tel aduh thu a rawn hrilh lehhnuhhnawh tak avanga; vawiin inneih niah pawh rawn tel ve leh ta a—afarnu pawh rawn hruai lut ta kha ani a !

Vawiin ni a, athusawi a sawi anga ka lettling lo pawh kha ka inthiam lo em em ta lo. Ka hna chu ka hlen lo chu nimahse, ka inchhir hran lo.

 

Tawng lehlin hi thil namai alo ni lo !


Lengkir bulah kan riak

Mizo zingah camping han tih chuan, Gospel Camping rilruah alo lang nghal a. Mahni in lum chhuahsan a, zan hnih khat (  kar hnih khat/ athla athla hial te pawh ani thei ang chu ) ramhnuai a riak bo hi camping chu ani mai ang chu. Ram riak tihte nen chuan a inang leh chiah bawk silo.

leigong mountain

Adventure Sports leh Outdoors activities lam reng reng hi chu ka tihve tawh chin chu nuam han tih loh em em hi ka la nei lo.

leigong shan

Lui hnar

lei shan

Kan riah hmun atanga lui mawng lam kan thlir chuan...

Kan veng khawlum lutuk tlansanin, chawlhkar hmasa; kartawp —weekend kha,  kan khua atanga km 40 vela hla—Leigong Mountain; Nature Reserve Area -ah kan va riakchhuak  a. Hman deuh pawh khan helai hmun kanva tlawhchhuah thu ka rawn post tawh kha.

chicken curry

Zanriah atan chicken curry

chapati

Atta ro nen

Lengkir bulah kan puan in kan kaih a; zanmut paha tuikhawhthla ri seng seng hriat te chu avan nuam tak em.

leishan

miao village

Kalkawngah Miao ho khua hmuh tur a awm nual

lu ruh

Mihring a ang ve em a