Chhurbura roh em em; Nahaia'n neihsak phet a tum!

Chhinlung Sichuan Province-ah a awm an ti maw ?


Mizote hian ziak a history upa tak chhui tur kan neih loh avangin kan lo chhuahna tak leh kan thlangtlak tan na tak hi kan chiang fak hleithei lo chu ani a. Kan hriat hlat theih ber ‘CHHINLUNG’ atanga lo chhuak kan ni tih hi ani mai awm e.

Hman atang tawhin he Chhinlung hi zawn a, ngaihven a; khawi ram lamah nge a awm tih a chhui ani deuh fo tawh a. Tu’n an la hmuchhuak lem lo ani ngei ang. Nge, tih tak takin kan chhui lo zawk ? Nge , Chhinlung hi a awm lo hrim hrim zawk ?

Tunhnaiah, Rev. Lalremliana chuan, ‘ Chhinlung khua chu China ram a, Sichuan Province-ah a awm a, mi 4000 vel an cheng. Tibet hnam an ni a, sakhuana lamah chuan Bhuddist an ni ‘ a ti a. Tin, kan hnam tihdan leh culture, tawnga thil inang kan neih te a sawi lang nual bawk a. Rev. Lalremliana hian a hmun ngeiah he khua hi a tlawh anih a rinawm a. Rev. ani bawk a, a thuhriatte a rintlak turah ngai ang.

Chhinlung khua chu Sichuan Province-a a awm thu, Rev. Lalremliana’n a sawi hi; The Aizawl Post, May 5. 2012 a chhuak kha, ka thiannun a copy  chu thla la in ka chhiar ve turin min rawn thawn a. Ka rilru a luah ta reng a.

Zawhna awm thei tam tak a awmin ka hria. Rev. Lalremliana hian engtinnge, Mizo history a; Chhinlung an tih kha, Sichuan Province ami hi ani ngei tih a finfiah theih. The Aizawl Post chanchinbu, May 5 . 2012- a chhuaka a sawi  danah hi chuan, kan tawng in an thute, tap a lungthu pathum an hman thute, khawkrawk tih tawngkam an hman ve thute leh di leh dap an hmanve thuute atarlang a. Heng hi  Mizo thlangthla bang an ni e, tih nana  thutlukna siam nan chuan a ho lam deuhvin a hriat. Achhan chu, Yunnan Province- ah ngei pawh hian hetianga kan inanna sawi tur leh chhui dawn tur hnam hi an tam em em. Chung zingah chuan, Hani hnam te, Jingpo hnamte hi kan ang lehzual a. Jingpo hnam nen phei hi chuan kan tawng pawh inang; lam rik dan inang leh sawi thuhmun a awm nual mai !  Han chhui dawn takah chuan, Yunnan Province, China vela tribal ( minorities ) awm te, Vietnam leh Thailand ramri bawr vela awm hi chu kan in anna lai sawi tur a tam khawp mai.

Rev. Lalremliana’n , ” Thlangtla an sawi thin. An thawnthuah pawh kan thlangtlak dante hi an la nei vek a, thurochhiahte pawh an nei. Keini ( Mizo ) te hi a upa zawkah min dah, “ tia a sawi hi chu, ngaihven zui tlak leh chhui chian chakawm tak ani . Mizo historian ho tana, chiang zawk leh chipchhiar zawk a chhui duhtu tan kawng a sat zau hle mai.

” Chhinlung khua kan pi leh pu te’n doral hlauva Yalong lui mawng lama an tlawh thlakna kawngte chu a la thlur thla ruih mai a…” tiin a sawi bawk a. A sawi lunglen thlak thiam khawp mai. Heng kawngte pawh hi kan pi leh pute kawng zawh ngei ani chek ang chu maw !

Chhinlung = Sinlung ? ! A hming hi kan buaina leh kan rilru min hnehtu ber chu ani  awm e. ‘Chhin’ tih lai tak hi rang vutin an lam a, thenkhat chuan Chinlung an ti bawk a. Map lamah erawh chuan Sinlung tia ziak te pawh ani tiin a sawi bawk. Rev. Lalremliana hian, Chhinlung tih thumal hi, Chinese tawng ( Mandarin ) nge anih a, Tibetan tawng anih a sawi lem lova. Mandarin anih chuan, Chhinlung tih a, ‘CHHIN’ tih lai tak hi, Mandarin thumal anih arinawm lem loh ! Tin lo ni ta pawh nise,  Chhinlung tih khaw hming  Sichuan province-ah hian map-ah hmuh tur re re a awm lo.

 Map lamah Sinlung anti a ti a. Map ka hmuh theih chin chin kan en hian , SINLUNG tia khaw hming pu a awm bawk si lova. Sinlung tih hian Mandarin a a awmzia ahnai theih deuh thova. Tihian lo siamrem ta ila : SINLUNG tih chu XIN LONG ani thei mai em?  A awmzia chu, Xin= Thar (new ), Long = Rulpui ( Dragon ) tihna lo i ta se, Tibetan culture leh Chinese ( Han ) culture a, Dragon an ngaih ropui zia nen a khaikhinin a awmang thei deuh. Hei pawh hi a thluk dan azirin a awmzia adang leh daih thova, tin hetia Chinese tawng; Roman Script- ‘ piyin’ a ziah hi a Chinese Script ( Han Zi ) a ziah dan hmuh tel loh chuan awmze hrang daih anei leh thei bawk. Tin, Chinese tawnga thumal awmzia dik tak hre tur chuan Han Zi ( Chinese script ) kan en ngei ngei tur ani ang.

Xin Long tih pawh chu lo ni tase; Tibetan hnam ho awmna anih avangin Xin Long tia an koh chu a rinawm lem loh bawk. Anmahni Tibetan tawngin ( Tibetan hnamah pawh eng hnam ber, Kham, Amdo etc. ) he khaw ‘original’ hming hi an nei em emin a rinawm. China a tribal hnam tamtakte, chenna khaw hming hi Chinese sorkarin a thlak sak, Mandarin a dah sak khaw chhiar sen loh a awm. Hetia, khaw hming pakhat kan tawng nen a rik dan a inzul avang mai a, ani ngei e tih tawp mai hi chu pawm a harsa deuh ani. A naka ka zen kher hma chuan !

A hming chungchang pawh hi, Rev. Lalremliana hian han sawifiah thui thei deuh ta se. Tin, CHHINLUNG / SINLUNG chu Sichuan Province a, eng county, eng prefecture chhungah nge a awm tihte han sawi lang thei se chuan, chutia kan pi leh pute ; China rama la chambang awmte chu hman lo chung chung pawn kan va tlawh chhuak ve hram tur ! Tibetan sakhuain a la phuarbeh tlat an nih phei chuan, keini an tu leh fate hian Lal Isua Chhandamna hrilh chu kan bat avan ni dawn rua em !

A hnuaia mi hi The Aizawl Post a mi chu ani a, chhiar ve duh in awm tak in.

Chhinlung chuak Mizote

Advertisements

20 responses

  1. A hming leh a awmna hmunah kan la buai ani maw. DNA anih hma chuan thutawp a siamtheih hmel love. A reng reng thuah Mizote chu Manashe a thalhte an ti ani lawmi…ha ha ha…

    Singpho/Jingpho ho thumal ka hriat awmchhun: Ngun-Wen.

    Mizo tawngin: Ngun.

    June 4, 2012 at 5:24 pm

    • Hehe. Nia, hotupa, Manashe mai nilov, Epharaim a thlah te pawh an awm a alawm. Anih ho phei hi chuan China-ah hian an torah kha a awm an ti.

      June 10, 2012 at 7:05 pm

  2. aduhi

    A tawpah chuan kan lo inchhung kual vek a nih hmel. Mahse i sawi ang deuh hian chanchinbu ah te meuh han chhuah tur chuan a naka zen kher chu a ngai ve deuh ka ti.

    Thildang daih, Aizawl Post chanchinbu atang khian American Idol an lo zawng leh tawh tih ka hre ve chiah 😛

    June 4, 2012 at 10:09 pm

    • Hehe. ni e, Novah pawh khan a chiang mai e …:-)

      June 10, 2012 at 7:06 pm

  3. Hei hi a ngaimawh awm ka ti lutuk. Nangni hi lo contact hmasak che u nachang te hi hre thin se. Tawng te chu family te te a awm a. Tibeto Burman tawng hnuai a mi ho te chu thumal hman inang a tam lutuk. Tin, hmanrua inang tak tak hman te pawh a tam…..kha, Kunming a Minority village a kan kalna ah te pawh khan a awm nual kha. Hman lang chuan research lo ti pah thei la tha viau tur, Rev a sawi hmun khi, Hriatchian a chakawm alawm male 🙂

    June 5, 2012 at 2:21 pm

    • I zarah ani hi! 🙂 Nang pawh linguistic lam atang ten han ziak ve la.

      June 10, 2012 at 7:06 pm

  4. A bengvarthlak thin hle mai, hotupa nge nge.

    June 5, 2012 at 7:45 pm

    • Tak tak maw 🙂

      June 10, 2012 at 7:07 pm

  5. puibawiha

    Chinese script en tel loh chuan ngaihsual a tam duh si chuan, kan chhinlung or sinlung (roman script) chuan chhuichian tur a va titam dawn ve. Chinese script chu kan sailo Lal te pawh khan an thiam awm si lo va. Tin Chhinlung tihah hian Lung tih lai tak hi a Mizo riau maiin ka hria.

    June 7, 2012 at 8:13 pm

    • Hotupa, A dik chiah. Mzio history ziahna ah reng reng hian, a tlangpuii hmun hming vel hi an ziah dan ang in kan ziak thin si lova, chhui thui ahar khawp mai. Zoram lam ka hawn pawh khan lehkhabu chutiang chu ka en nual a, buaithlak tak ani. Kan pi leh pute lo awmna hmun hming tak kha chu, china ramah pawh hian lo awm thin ta teh reng pawh nise; tuna a hming hote nen hi chuan adanglam hrim hrim tawh ang. Chuvang chuan ania, lam rik dan in anga vang mai a, ‘ hei hi a lo ni ngei e’ tih tawp hi a convincing lo ka ti deuh ani. Chinese tawng hei hi a script awm lo leh athluk na dah miah lovin han chhiar dawn ta ila : ma, ma, ma, ma 🙂 Awmze hrang an nei vek a, a scriptah chuan a ziak dan a inang lo.

      June 10, 2012 at 7:11 pm

  6. A ve hlawkthlak dap dap ve, i awmnain a zir bawk a, han chhui vak teh..hotupa.

    June 10, 2012 at 2:57 am

  7. ti lawmawm e hotupa 🙂 Ni e, ka phak ang tawk tawka chhui ve pawh ka chak thin a. Yunnan a ka awmlai phei kha chuan ka tum ve nasa. Kan Mizo history, he lam hawi ziahna hi ka en nual a; sawi tawh angin hmun hming an sawite hi zawnchhuah a harsa hlawm em em a. Khaw hming te hi an ziah dan zulzui chu ni thin ta se chuan chhui te pawh a awl deuh tur.

    A ziaktute hian anmahni fan tawh, kal tawhna chat chat an ziak lem bawk si lova. Keinin kan bul tan ve theihna chua, lehkhabu awm sa atangin ani deuh mai si a. Han chhui vak hi a har khawp mai , hotupa. Rev. Lalremliana pawh hi hawng hunah han kawm ve ngei tur niin ka hria. A hmun ngeiah a kal bawk a.

    June 10, 2012 at 7:13 pm

  8. A thu hnial deuh lo khan thudik chu lo chhui chhuak teh khai. I sawi ngaihnawm hle mai kan Zhonggua ren pa chu. Ni (yes) chu ni, Nilo (NO) chu nilo hian ziak mai ni sela tha tur.

    Ni e, Chinese tawng hi roman hawrawp a han ziah hian a thlukna chihrang hrang awm a zirin awmzia a hrang niai reuh a, fimkhur angai asin. Chuvangin khawnge Zhonggua ren ka tih pawh khi alo chhiar sualloh phah nan, “Zhōnggua` rên kan ti hram ang e… 🙂

    June 13, 2012 at 4:12 am

    • A thu ziak atang ringawt hi chuan chhui chian a har deuh em a, hawn leh hunah amah han hmuh ka tum. A kalna te, a awmna lai tak te zawtin.

      June 17, 2012 at 12:48 am

      • Chu chu a tha ang.

        June 17, 2012 at 12:35 pm

  9. Buata

    Chhinlung chhuak kan nih ah hi chuan ka chiang ve tawp.. Mahse, Pu Rama thu ziak ah hi chuan, i sawi ang hian “a nâka ka zen hma loh chu” ti hi ka ṭanna a ni ve.

    Pu B. Lalthangliana chuan.. “Atlas of China, Beijing, 1989-ah chuan khaw hmingah ‘Xinlong’ tih hi pahnih a awm a, ‘X’ hi ‘sh’anga lam rik tur a ni a. Tin, April 1995-a China ram Yunan University kan tlawh ṭumin map hlui deuh kan ena Çhhinlung’ or ‘Xin Lung’ tih inziak kan zawn tir a, a awmzia kan zawt a. Min lo dawngsawngtu Mr. Liao Jianbo, Internationla Exchange Programme Deptt. chuan Chinese tawnga inziak map-ah a han zawnga, a hmu zo lo va. ‘Hman lai khaw hlui, tuna awm tawh lo a nih vanga chuang lo a ni mai thei, lo awm pawh ni se, hming in ang palh mai a ni ang, awmzia neiin ka ring lo’ ati nghe nghe” tiin a lehkhabu ‘MIZO CHANCHIN CHIK TAKA CHHUINA’ phek 12-na ah a ziak a.

    “Mi pakhat pawhin “Mongping” khua tih Map hlui taka a hmuh avangin Chhura thawnthu a MAWNGPING KHUA kha ni ngei in a ngai a, a buaipui hman viau a ni awm e. Mahse, Roman hawrawpa an ziah dan khan a ti ang lek fang a lo ni a. Tawng danga an ziak dan atang chuan “Maw-ping’ ti a lam tur a lo ni daih si a ni awm e..

    Rev. Lalramliana chuan han ziak chiang lehzual deuh se aw.. tuna a ziah chin hi chu a tawi deuh em a, a sawi khua leh hmun pawh hi, kan chawrchhuahna ah chuan ka pawm mai thei hrih lo. Hmun danga kan anpui an tam ve tho si..

    “Chhak lam chhuak kan ni a, tin kan pi leh pu (hman lai lehzual) te kha Pûk a lo khawsa ve tawh an ni a. In leh lo, Bûk sakna chang kan hriat hma, hmân lai hunah Lung pûk ah kan khawsa ṭhin”… “kan chawr chhuahna lam chu khawchhak lam khi a nia… ” tiin kan in hrilh chhawng zel mai ah ka ngai.. . “Khi lai khua khi” han tih deuh fak chu pawm a har em mai ti raw..

    June 25, 2012 at 12:46 am

  10. Chhinlung chhuak kan nih ah hi chuan ka chiang ve tawp.. Mahse, Pu Rama thu ziak ah hi chuan, i sawi ang hian “a nâka ka zen hma loh chu” ti hi ka ṭanna a ni ve.

    Pu B. Lalthangliana chuan.. “Atlas of China, Beijing, 1989-ah chuan khaw hmingah ‘Xinlong’ tih hi pahnih a awm a, ‘X’ hi ‘sh’anga lam rik tur a ni a. Tin, April 1995-a China ram Yunan University kan tlawh ṭumin map hlui deuh kan ena Çhhinlung’ or ‘Xin Lung’ tih inziak kan zawn tir a, a awmzia kan zawt a. Min lo dawngsawngtu Mr. Liao Jianbo, Internationla Exchange Programme Deptt. chuan Chinese tawnga inziak map-ah a han zawnga, a hmu zo lo va. ‘Hman lai khaw hlui, tuna awm tawh lo a nih vanga chuang lo a ni mai thei, lo awm pawh ni se, hming in ang palh mai a ni ang, awmzia neiin ka ring lo’ ati nghe nghe” tiin a lehkhabu ‘MIZO CHANCHIN CHIK TAKA CHHUINA’ phek 12-na ah a ziak a.

    “Mi pakhat pawhin “Mongping” khua tih Map hlui taka a hmuh avangin Chhura thawnthu a MAWNGPING KHUA kha ni ngei in a ngai a, a buaipui hman viau a ni awm e. Mahse, Roman hawrawpa an ziah dan khan a ti ang lek fang a lo ni a. Tawng danga an ziak dan atang chuan “Maw-ping’ ti a lam tur a lo ni daih si a ni awm e..

    Rev. Lalramliana chuan han ziak chiang lehzual deuh se aw.. tuna a ziah chin hi chu a tawi deuh em a, a sawi khua leh hmun pawh hi, kan chawrchhuahna ah chuan ka pawm mai thei hrih lo. Hmun danga kan anpui an tam ve tho si..

    “Chhak lam chhuak kan ni a, tin kan pi leh pu (hman lai lehzual) te kha Pûk a lo khawsa ve tawh an ni a. In leh lo, Bûk sakna chang kan hriat hma, hmân lai hunah Lung pûk ah kan khawsa ṭhin”… “kan chawr chhuahna lam chu khawchhak lam khi a nia… ” tiin kan in hrilh chhawng zel mai ah ka ngai.. . “Khi lai khua khi” han tih deuh fak chu pawm a har em mai ti raw..

    June 25, 2012 at 12:48 am

  11. Pu Sekibuhchhuak, ka thiamna tlem bâkah, ka net a chiang lo, comment ka post double, lo remove ṭhen mai rawh aw..

    June 25, 2012 at 1:29 am

  12. Hmmm…hei hi thu tha tak a ni. Kan hnam chhui thui dawn chuan China lam hi chu a kawk deuh zel hmel rih a. Chiang fek fawk a han zir chiang tur awm se, hriat chian zel chakawm e.
    Hotupa i ziak tha e. thu pawh i rem nalh tawi fel khawp mai.

    July 22, 2012 at 12:17 pm

  13. Angu Da Piper

    Hman Historian pakhat CHINA ah mizoram Sawrkarin a tir a, Lehkhabu chhahtawk a ziak a ni lawm ni.. heheee…. Nimahsela, khapa thil han chhui kha 5* ah an hreng tih pa pakhatin mihriklh bawk… Kan History hi a bangbo a ni ber awm e

    July 20, 2015 at 3:42 am

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s