Chhurbura roh em em; Nahaia'n neihsak phet a tum!

Kristian Van Ram Kawng Zawh Thu: Bung – 1


He mi khawvela ka vah ka vah laiin khawii hmun emaw puk awmna ka va thleng a, chutah chuan ka han muhil a;tin, chuta ka muthilh lai chuan mumang ka lo nei ta a. Ka mumangah chuan mi pakhat puan chhe tak sina a in lam chu hawisan renga ding ka hmu a. Chu mi chuan lehkhabu pakhat hi a keng a, a hnungzangah chuan phur rit tak hi a phur bawk a. Tin, ka en reng a, a lehkhabu chu a keu va, a han chhiar a; tin, a han chhiar chuan a tap a, a khur a, chutichuan a ngawi hle hle thei ta lo va.”Engtinnge ka tih tak ang ?” tiin lungngai takin a tap ta chiam a.

Chutichuan lungngai takin a in lamah a haw leh ta a. A lungngaihna chu a nupui leh  a fate hriat theih loh nan a inthup hram hram a. Nimahsela a lungngaihna chu a lo nasat deuh deuh avangin a inthup rei thei ta lo va, chutichuan a nupui leh a fate hnenah chuan,”Aw, ka nupui leh ka fa duh tak te u, kei, in mi duh tak hian phur rit tak ka phur a, chumi avang chuan ka boral dawn ani. Chu lo rengah pawh he mi kan khua hi van atangin meiin a rawn kang chhe vek ang tih miin min hrilh a, chu mi hlauhawm tak chuan nangni ka fa duh tak te, ka nupui nen keimah chawp hian min tiboral vek ang, a pumpelhna kan hmuh a kan him theih mial nghal loh chuan,” a ti a.

Chutichuan, a laichinte chu an mangang a; chu a thusawite chu a dik ang tih an rin vanga mangang zawng an ni lo va, thil tha lo engngemaw a zawl ani ang tih an rin avanga mangang an ni zawk a. Khuate pawh a lo thim dawn tawh a, chutichuan muhil sela a reh deuh ang e, tih an rin avangin an muttir ta thuai a.

Nimahsela, zanah pawh chuan chhun ang bawkin a lungngai a, muthilh ahnekin lungngai rum leh khurin a tap zankhua zawk a. Khua alo var chuan eng angin nge a awm tih an zawt a, ani chuan a zual deuh deuh zawk tih a hrilh a. Tin, an hnenah chuan a lungngaihna thute chu a sawi leh a, nimahsela an rilru an tikhauh ta tlat a. Tin, anni chuan tihnawmnah leh vinin a reh theih an ring a, chutichuan a changin an nuihsan a, a changin an zilh a, a changin an thlahthlam der thin a. Chutichuan an tan tawngtaisak tur leh a lungngaihna tihreh tura dil turin ama pindanahte an kal thin a. Amah chauh tein phulah a leng thin a; a changin a lehkhabute a chhiar a, a changin a tawngtai a; chutiang chuan ni engngemaw zat lai chu a awm a.

Chutia phula a kal a, a lehkhabu a chhiar lai chuan a rilru a lo mangang ta em em mai a, hmana a tih ang bawk khan “Chhandama ka awm theih nan engtinnge ka tih ang?” tiin a au leh ta chiam a. Tin, tlan tum ni awm takin a hawi vel ruai mai a; nimahsela khawi lama tlan tur nge tih a hriat loh avangin a ding reng a. Chutichuan ka en reng a, mi pakhat a hming Pathianthuhriltua a hnenah chuan a lo kal a,”Engvangin nge i tah ?” ati a. Tin, ani chuan,”Ka pu, ka lehkhabu kenah hian thi tura ruat ka nih leh chumi hnua rorelnaa kal tur ka ni ka inhria a, tin, thihte chu ka ngam si lo va, rorel saka awm pawh chu ka zuam bawk hek lo,” a ti a. Tin, Pathianthuhriltua chuan,”Engangnge thih  duh loh ? He khawvelah hian sual a tam vei nen ?” a ti a.

Tin, ani chuan, “Ka phurrit phurh hian thlan aia thuk zawkah min pilpuiin leilawtah ka tla ang tih ka hlauh vang ani; tin, thih chu ka ngam si loh chuan rorelnaa kal pawh chu ka ngam chuang si lo, chuta ka kal chuan hrem ka ni ngei dawn si a, chung ang chu ka ngaihtuahin ka tah a chhuak a, ka tap thin a ni,” a ti a.

Tin, Pathianthuhriltua chuan,”Chutiang chu i awmdan a nih si chuan engatinge hetia i din reng mai ?” a ti a. Ani chuan,”Kalna tur chuang hre hek lo i” ati a.Tin, Pathianthuhriltua chuan lehkhabu a pe a, chutah chuan,” Thinur lo thleng tur chu tlansan rawh u,” tih ziak hi alo chuang a. Chu chu a han chhiar chuan Pathianthuhriltua chu ngun takin a en a,”Khawiahnge ka tlansan ang.”tiin a zawt a. Tin, ani chuan phul zau tak lam a kawhhmuh a,”Saw ta kawngkhar saw i hmu em ?”a ti a. Ani chuan,”Hmu lo” a ti a. “Anih leh sawta eng saw i hmu em ?”a ti leh a. Ani chuan,” Ka hmu awm e,” a ti a. Chutichuan Pathianthuhriltua chuan, “Sawta eng saw ngun taka enin pan ta la, kawngkhar i va hmu ang a, chu chu han kik la, i tih tur chu an lo hrilh ang che” a ti a.

Chutichuan ka mumangah chuan chumi chu tlan ta chiam hian ka hmu a.  A in atanga hla mang lo a thlen chuan a nupui leh a faten an lo hria a, kir leh turin an au chiam a thin a; mahsela ani chuan a beng a hup a,”Nunna, nunna chatuan nunna,” ti chungin a tlan ta zel a, chutichuan hnung lam hawi duh hauh lovin a kal tumna lam chu panin a tlan ta zel  zawk a.

                                           **********************************************************************

Kristian Van Ram Kawng Zawh Thu [ The Pilgrim’s Progress ] hi ka lehkhabu chhiar tawh zingah ka duh ber pawl ala ni fan. Nasa taka ka nun min chawmtu leh min khawih danglamtu ani. Tuna a copy ka kawl hi a hlui tawh deuhva, a lettu leh chhuahtu inziahna phek a tla tawh anih ka ring. Ka hriat dan  chuan, Mizoram Baptist pastor hmasa ber Pastor Chuautera lehlin niin ka hria. Pathian Ni pual a chhiarah ka rawn chhawpchhuak ani e. A saptawnga chhiar duh tan tah hian a chhiar theih bawk e. [ Click ] 

Advertisements

10 responses

  1. caribou

    Lung a tileng hle mai a. Pawl 6 leh pawl 7 ka zir kum khan Kristiana Vanram Kawngzawh Bu hi Scripture ah kan zir thin a. A ngaihnawm bawk a, ka chhiar chhuak zing hle.

    December 4, 2011 at 12:16 am

    • caribou

      “Kristiana Vanram Kawngzawh” ka ti ngawt a, ka type sual. Kristian Vanram Kawngzawh tih tur a ni. Tihsual hi ka ching ve reng reng anih hi.

      December 4, 2011 at 12:18 am

      • Kristiana Van ram kawng zawh thu ani ber a lawm le ! 🙂

        December 4, 2011 at 8:27 pm

    • Hnamdang Theologian hmingthang deuh deuh te hian an lo ngaihlu khawp mai.

      December 4, 2011 at 8:28 pm

  2. aduhi

    Ekhai hei zet chuh! Hman hunah muangmara chhiar tur anih hi, naktukah ka lo chhiar ang. Middle School ah khan kan zir thin tak kha le.Lawilo Dawrpui tih vel a rawn lang nghal chuai chuai mai. Lung ti lengin.

    December 4, 2011 at 3:24 am

    • Middle School a zir phak chin i ni ve ani maw ! 😛

      December 4, 2011 at 8:28 pm

  3. TSA

    A ngaihnawm khawp mai. Chhiar tur pawh ka nei bik bik! Keini chu High School-ah kan zir tawh bawk.

    December 5, 2011 at 12:11 am

    • I see, anih chuan Aduhi ai chuan ‘ thar tlai’ hret ani maw 🙂

      December 11, 2011 at 1:56 am

  4. Ma-i Mizo

    A bu hi chhiar leh tur ka duh ngawt mai, ngun takin ka chhiar chhuak i ziah hi. Ka lawm lutuk..

    December 8, 2011 at 5:11 am

    • Dam te awm chuan a bu pum, Pathian Ni a chhiar turin ka rawn chhawpchhuak thin ang. Bung 10 chiah anei a lawm. I tan te chuan all-zaww! 🙂

      December 11, 2011 at 1:58 am

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s