Chhurbura roh em em; Nahaia'n neihsak phet a tum!

Khawiah nge Mizo Rimawi Hmanruate ?


Kan Zosap pakhat chuan, Nausen an lo pian hian an tap thin a, Mizo nausen a lo pian chhuah erawh chuan an zai thung tiin kan zai ngainat zia a sawi. Ni e, Mizote hi kan awm khawm let let tawh chuan kan zai deuh mai zel lah taka, zin kawngah ani emaw, sakhuana thilah ani emaw, hlimni, lungngaihni- ah te kan zai a, kut niah te thlengin kan zai a. A hmun leh ahun a zirin hla sak tur pawh kan nei hrang thliah a, kan hnam hausak ve na tak pawh ani awm e!
Abikin tunlaiah ngat phei chuan zai thei apui kan tam tawh a, music video pawh, A , Aw, B sawichhuak thei tawh phawt chuan kan siam ta emaw tihturin atam a . Tunah chuan, zaithiam aiin , zai thei kan ngah tawh zawk hmel a, fiamthua an sawi thin, ‘ an khaw zai huai ‘ an tih ang chite pawh kha kan kat nuk tawh mai awm e !

Zaithiam kan pung zel a, a inla ‘ kul ‘ zual deuhin, khawthlang tihdan kan copy zel bawk a, zai thiam pawh ni tawh mai lo, zai bawk a tawng kawp thiam, an lukhum hmathlawk khuma an hmai pawh tilang mang lova, saihuai ni do ang deuhva, hawi pawh hawi chhuak manglova, kap zen ang treng tawng a, rawn ‘ chham-zai ‘ , rap an tia maw ni, te pawh kan nei ve ta zel a, hmasawnna chu ani chek ang chu ! πŸ™‚ Keini ang duang sephung laia, kekawr mawngpawp bel chunga ‘ lawr ‘ pas ve mai tan phei chuan eng music huang ( genre ) ber a khung tur nge tih pawh kan hre ta mang lo !
Chutiangin mal zai ni mai lo, group / band anga dingte pawh kan pung zel a. Rimawi hmanrua ( musical intrument ) hman thiam lamah pawh hma kan sawn ve tawh khawp mai. A thiam deuh phei chuan, a zut chiau mai pawh ni tawh lovin, an zut rak vak vak a, an zut trek chhuaih chhuaih a, a tingtang chu a tawng thei ta emaw tih mai tura mawi ani !
Keini ‘ thring drup ‘ bit a thla eng hnuaia, hauhuk hual reu ang maia au ve chiam chiam thin tan zawng, a sang em ani. Ani, kan rappuichungsang ai pawn a sang deih zawk ang maw le ! πŸ™‚ Chutihrual chual chuan, Mizo musical instrument hmang tel chu kan vang viau lawi si !
Hetia music lama hma kan sawn a, sap tihdan zir reng renga kan hmanhlelh viau lai hian, ka rual lo awh vena thin pakhat chu, kan Mizo rimawi hmanrua ( traditional musical intrument ) te hi kan music thiamte leh zai thinte hian ngaihsanna chang hriain, han chawisang tharse tih hi ka lo ngaihtuah ve reuh reuh thin .
Heng kan mizo rimawi hmanruate:
1) Lemlawi
2) Phenglawng
3) Rawchhem
4) Tumphit
5) Talkhuang
6 ) Hnahtum
7) Pawt-pawt
8) bengbung
9) Darbu etc… hi thangthar zawkte phei chuan kan hre tawh mang awm lo ve. Heng Mizo rimawi hmanruate hi, tunhma chuan zai nan vek a hman chu ani lo mai thei, mahse, heng hmang hian rimawi, mawi tak, kan zai honna leh mal zai, band ah pawh zeh tel dan hi awm thei se avan duh awm em!

Tin, kan Pathian biak inkhawmna-ah pawh hian, keyboard leh electric tingtang te kan hmang mek zel a, a tha e ! Chutihrual chuan, Mizo rimawi ri hi kan Pathian pawh hian a hre ve chak ngawt te hian ka ring thin !

Kum 2000, Zemabawk KTP General Conference nitain ka hria, khata sap Music thiam pakhat rawn chhim pawh khan, kan inkhawmpui a comment-na pakhat chu, ..Khawiah nge Mizo rimawi te an awm “ ati e an tia ni lawm ni kha !

@ pic : from internet πŸ™‚

Chinese band pakhat, 12 Girls Band hi kan hre tawh hlawm mai thei. Anni hian, traditional Chinese intruments, erhu ( Chinese fiddle ) , pipa ( pear- shaped lute ) , guzheng ( zither) yangqing ( hammered dulcimer ) , dizi ( transverse flute ) , xiao ( vertical flute ) duxiangqin ( single – stringed zither ) hulusi ( three – piped gourd flute ) te chu, athing em mai, kan hnam music ve hi an ti lova. Tih ahnekin heng hmang hian hla hrang hrang, Chinese floks hla atanga, pop, rock, jazz thlengin an tum a, khawvel an deng chhuak a, khawvel hriatah, traditional Chinese rimawi hmanrua -te chu khawvel hriatah an pho chhuak hial ani ! Hetianga kan Mizo rimawi hmanrua pho chhuak ve thiam a, rawn chawisang thiam te hi rawn chhuak zel se la a van duhawm em !

Tin, kan ramah, Sap kan ngaihsan te pawh hi lo zin se, an hmuh chak tur chu, kan Millenium Center te ai mahin, Reiek zokhuate hi anih a rinawm a, chutiangin, Music ah pawh, electric tingtang ri ai in, keimahni Mizo music ngei, ri mawi tak hi an ngaihthlak chak tur ani.

Hnam changkang zawkte rimawi hmanruate, an zai dan te leh an thil tihdan te kan copy a, kan inzir a ngaih hun tam tak a awm a, chutihruala, keimahni ta ve ngawih ngawih, Siamtu Pathianin a min pek hlu tak te kan ngaih hlut leh thiam zi loh a, athing emaw kan tih tlata, kan zahpui anih tawh chinah chuan, kan Mizo naah hian kan chiang tawk lo emaw, kan lawm tawk lo emaw ani thei ang a, chutiang zelin kan Kristianna ah pawh hian kan chianglo ani thei hial in ka ring !

Advertisements

One response

  1. chhawna

    mizo rimawite hi a lem nen awm se a va duhawm em aww..

    July 1, 2017 at 3:02 pm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s