Chhurbura roh em em; Nahaia'n neihsak phet a tum!

[ Foreigner Zirlai-te Outing ]


Nimin ( 7 th.Friday ) khan kan University-in foreign student -te tana kum tina an neih thin , ‘ outing ‘ kan nei a. He ‘outing ‘ hi foreigner zirlai te’n, China rama hnam chi hrang hrang chengte, culture leh tihdante an hriat theih nan a, kumtina University-ten an huaihawt thin ani.
Tun tumah hian, kan khua ( KM ) atanga hla vak lo, Nuo Hei– khuaah nilengin hun kan va hmang a. He khua hi hmun hmingthang tak Stone Forest ( shi lin ) bul lawka awm ani a, ami cheng tam zawk te hi Yi hnam an ni. Yi hnamte hi zai leh lam, zu leh sa ngaina tak hnam an ni a. Sakhaw lamah chuan, thing, lungpui, ni , van leh huai chi hrang hrang an bia a. Hmanlai kan pipute rin dan ang deuhvin, huai chi hrang hrang-ah an rinna an nghat thuk hle bawk. Yi hnamte hi China-ah hian over 8 million vel awma chhut an ni a, chung zinga over 4.5 million chu ka awmna province-ah hian an cheng ani.

He kan khaw tlawh hi, Stone Forest bul lawka awm anih vang nge, an khua-ah hian lung a tam em em maia, an in bang atana an hman ber pawh lung a ni. Tunhma phei chuan chung bang atana an lung rem te chu cement emaw a char a ni ngai lova, chuti chung chuan kum tam tak an in chu tha takin a ding ve tho mai.

Zinglam dar 11 velah he khua hi kan thlenga, an khaw kianga Dil hmingthang pakhat Shou Hu an tih chu kan tlawh phawt a. He dil hi helai hmuna cheng Yi ho chuan an ngai hlu em em a. An thawnthua an legend ve pakhat, Ashi Ma a tualchaina hmun pakhat ani awm e. Chhunchaw atan kelsa chhumte, mai chhumte, antam chhumte, leh thlai chi hrang hrang min lo hlui a, kan tlai in kan puar hle. Chutihrual chuan kan American leh European thiante kha chuan kelsa chhum kha chu ei har an tih khawp mai. Kan thiannu American pakhat phei chuan uisa emaw atia , a tawk lo hrim hrim.
Chhunchaw te kan ei zawh hian, an khaw chhung kan fang kuala, hemi hnu hian, an primary school kawt tualzawl-ah intihhlimna hun kan hmanga. Min lo lawm nan an hnam lam leh zaite an lo entir bawk a. An mahni hnam infiamna chi hrang hrang, Vaimim in phurh / thiar siak ( bao Yimi ) , bawngtawlailir in hnuh siak leh inhruipawh hmangin akhaw mite nen inelna kan nei bawk a. Hetianga intihhlimna hun kan hman zawh hian, Group 5 ah min then a, kan zanriah eina tur lam ah min hruai ta a.

Zanriah atan pawn an chawhmeh tui tha tha min lo buatsaih saka, chawhmeh chi hrang hrang atam lutuk a, kan ei seng lo ani ber mai. Kan chaw ei dawhkan-ah chuan hmawlh sei deuh mai hi an chhawp , eng atana hman tur nge kan hre lo! Chopstick an chhawp silova, fian an chhawp bawk si lo, kut in heng hnamte hian an ei ve thin em ni chu aw ka ti hman a. Nakin deuhvah chuan, min thlengtupa chuan, ” In dawhkan a, hmawlh sei deuh kha, in chopstick tur ani e ” a rawn ti ta mai a. Ka chopstick hman tawh-ah chuan ala lian ber awm e ! Chaw ei a har mai mai teh asin aw!
Chutia chopstick lian hmanga kan buai fe hnu chuan, min thlengtu pa bawk chuan, In chopstick thlak a hun e arawn ti a. A te ate mang kheng, nawalh fung u awrh tur hi min rawn sem leh ta diat diat a. Chopstick sei a ei a har ang tho khan ate pawn a awl chuang hauh lo. Chutia chopstick te a kan ei duh zawng kan chai leh fe hnu chuan, kan thlenna pa bawk chuan, In chopstick thlak ahun leh tawh e a rawn ti leh a..” Chopstick pangngai min pe ta a, hnara hlit phawi ang huai ani ta! Nakinah chuan, kan thlenna pa bawk chuan, an mikhualte an lawm ve dan chi khat anih thu min hrilh ta a! Min bawl ani ber e ! 🙂

Kan sawi tak ang khan Yi hnamte hian zu an ngaina in an chelek em em a. Kan chaw ei dawhkan ah chuan, no te reuhte hian zu, an mahni siam, 37 % alcohol, tak em em mai chu min chhawp vek bawk a. Ka’n tem chhin chu, ka chhung hi a sat hian a sa nghal vek a, ka kamte chu a kang ta emaw ka ti hman hial a! Keini a chhin ringawt rapsawi a, khawih danglama awm thin tan chuan , a sang em ani, lu mam !
Nakinah chuan, an nula leh tlangval thenkhat chu kan chawei dawhkan tinah an rawn kal kual a, min rawn ‘ gan bei ‘ ta liam liam a. In in ngei ngei tur ani an ti tlat si a, in ang deuh chuan kan ti ve a, an tlangval pakhat chuan i la in lo kha, atia min din chilh ta tlat maia ! An nula te chuan ” jaiyo jaiyo “ an lo tia, min lo au phur nasa mai a. I in hma chu kan kal sawn dawn lo an ti tlat bawk si a. Ka tih nghaihna hrelo chuan, no khat chu thaw miah lovin kan tlak ve pap mai a! Awi awi…ka pum chu ka pum chu..meidil ! 😀

Tin, Yi hnamte hian mei hi an ngaina em em bawk a, an festival lian ber pawh ” Huo Pa Jie” ( Torch / Fire Festival ) tih ani. Tichuan, zanriah te kan ei kham hnu chuan tual zawlah meipui an chhep a, kan zai a, kan in kaikual a kan lam dual dual a! Zan dar 9 velah chuan, ” Tlai khua pawh var ila, kan in ning chuang law’ng nge ” ti chung zelin kan tin ta a.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s